لاہور ( این این آئی)کالا باغ ڈیم کی تعمیر نہ کرنے پر ملک گیر سطح پر ریفرنڈم کرانے کے لئے سپریم کورٹ لاہور رجسٹری میں جلد سماعت کی درخواست دائر کر دی گئی۔ وطن پارٹی کے سربراہ بیرسٹر ظفراللہ کی جانب سے دائر درخواست میں موقف اختیار کیا گیا ہے کہ وفاقی حکومت، مشترکہ مفادات کونسل اور سیاسی جماعتیں کالا باغ ڈیم تعمیر کرنے میں سنجیدہ نہیں ہیں، وفاقی حکومت مشترکہ مفادات کونسل کی جانب سے کالا باغ ڈیم کی تعمیر کرانے کے فیصلے پر عملدرآمد کرنے میں بری طرح ناکام ثابت ہوئی۔وفاقی حکومت، سیاسی جماعتوں اور مشترکہ مفادات کونسل کی جانب سے کالا باغ ڈیم کی تعمیر کا معاملہ التوا میں ڈالنے سے ملک اندھیروں میں ڈوب چکا ہے جس سے معیشت کا پہیہ بھی جام ہوا ہے، صنعتی مزدور بیروزگار اور پانی کے ضیاع سے زرعی اراضی بنجر ہو رہی ہے۔ لہٰذا معزز عدالت سے استدعا ہے کہ کالا باغ ڈیم کی جلد تعمیر کیلئے ملک گیر سطح پر ریفرنڈم کرانے کے احکامات صادر کئے جائیں۔