کراچی(این این آئی)پاکستان پیپلز پارٹی کے چیئرمین بلاول بھٹو زرداری نے کہا ہے کہ پاناما لیکس کے معاملے پر حکومت کو بھاگنے نہیں دیں گے، نواز شریف سے سمجھوتاہوگا اور نہ ہی کوئی رعایت ہوگی، اب مفاہمت حکومت سے نہیں، بلکہ اپوزیشن سے کریں گے۔ اپوزیشن کیساتھ جہاں جہاں چلنا پڑا چلیں گے۔بلاول بھٹوزرداری نے پارٹی رہنماؤں کو ہدایت جاری کی ہے کہ اگر حکومت پاناما لیکس کی تحقیقات کے لیے اپوزیشن کے ٹی او آر نہ مانے تو وہ اس معاملے پر ڈٹ جائیں۔بلاول بھٹو زرداری نے پارٹی رہنماؤں اور پاناما لیکس کی تحقیقات کے لیے ٹی او آر بنانے والی پارلیمانی کمیٹی میں شامل پیپلز پارٹی کے ارکان کو ہدایت کی ہے کہ پارٹی رہنما حکومت کو کوئی متبادل راستہ نہ دیں، حکومت ہمارے ٹی او آرنہ مانے تو ڈٹ جائیں۔انہوں نے کہاکہ پارلیمانی فورم پر بات نہ بنی تو عوام میں جائیں گے، اپوزیشن کے ٹی او آر نہ مان کر حکومت خود اپوزیشن کو دوسرا راستہ اختیار کرنے پر مجبور کررہی ہے۔