کراچی(این این آئی) پاکستان میں فلاحی سرگرمیوں کے حوالے سے مشہور ایدھی فاؤنڈیشن کے سربراہ عبدالستار ایدھی نے سابق صدر اور پاکستان پیپلز پارٹی (پی پی پی) کے شریک چیئرمین آصف علی زرداری کی جانب سے بیرون ملک علاج کی پیشکش کو مسترد کردیا۔سابق وزیر داخلہ رحمن ملک سابق صدر آصف علی زرداری کی جانب سے بیرون ملک علاج کرانے کا پیغام لے کر عبدالستار ایدھی کے پاس پہنچے تاہم معروف سماجی کارکن نے اشارے سے انہیں بتایا کہ وہ پاکستان میں ہی رہنا چاہتے ہیں اور پاکستان کے سرکاری ہسپتال میں ہی علاج کروانا چاہتے ہیں۔اس موقع پر رحمن ملک کا کہنا تھا کہ اگر عبدالستار ایدھی کی صحت بہتر نہ ہوئی تو وہ دوبارہ آئیں گے اور انہیں علاج کے لیے خود لے کر جائیں گے۔