لاہور(نیوزڈیسک) اورنج لائن میٹرو ٹرین منصوبے کے لیے قرضے اور شرح سود کی تفصیلات کے حصول کے لیے لاہور ہائی کورٹ میں درخواست دائر کر دی گئی ۔مقامی شہری منیر احمد نے اظہر صدیق ایڈووکیٹ کے توسط سے دائر درخواست میں موقف اختیار کیا ہے کہ پاکستان مجموعی طور پر 2100 کھرب کا مقروض ہے ،قرضوں کا اس زیادہ بوجھ ہونے کے باوجود مسلسل قرض لیا جارہا ہے۔موجودہ حکومت نے تین ماہ میں 4200 ارب کے نئے قرضے لیے ہیں جس کا براہ راست بوجھ عوام پر پڑے گا۔میٹرو ٹرین منصوبے کے لیے بھی حکومت نے قرض لیا ہے۔ درخواست گزار کی جانب سے استدعا کی گئی کہ حکومت سے اورنج لائن میٹرو ٹرین منصوبے کے لیے قرضے اور شرح سود کی تفصیلات طلب کی جائیں۔