کراچی(نیوزڈیسک)ذوالفقار بھٹو کی برسی کیلئے جاری کیے گئے ڈھائی کروڑ روپے پیپلزپارٹی کو بھاری پڑ گئے، سندھ حکومت نے پاکستان پیپلز پارٹی (پی پی پی) کے بانی ذوالفقار علی بھٹو کی 37 ویں برسی کے موقع پر انتظامات کےلئے جاری کیے گئے ڈھائی کروڑ روپے کے فنڈز روک دیئے۔سرکاری خزانے سے اتنی بڑی رقم جاری ہونے کے بعد پیپلز پارٹی کی سندھ حکومت کو سیاسی مخالفین کے ساتھ عوامی سطح پر شدید تنقید کا نشانہ بنایا گیا تھا جس پر پی پی پی کے چیئرمین بلاول بھٹو زرداری نے اس کا نوٹس لیا اور اب وزیراعلی سندھ قائم علی شاہ کی ہدایت پر کارروائی کی گئی۔سیکشن افسر کی جانب سے جاری کیے گئے نوٹیفکیشن میں بجٹ کے اجراءکا سابقہ اعلامیہ منسوخ کیا گیا۔نوٹیفیکیشن میں کمشنر لاڑکانہ کو فنڈز استعمال نہ کرنے کا حکم دیا گیا ہے۔