اسلام آباد(نیوز ڈیسک ) وفاقی دالحکومت کے ریڈزون سمیت جڑواں شہروں کے بیشتر علاقوں میں دھرنے کے باعث موبائل فون سروس طویل دورانیہ کے لیے معطل رہی جس کی وجہ سے معمولات زندگی مفلوج ہو کر رہ گئی ،ملکی تاریخ میں پہلی مرتبہ موبائل فون سروس طویل دورانیے کے لیے بند کی گئی ،تفصیلات کے مطابق گزشتہ روز وفاقی دارلحکومت میں ریڈ زون سمیت مختلف سیکٹرز میں موبائل فون سروس معطل رہی ،جس کی وجہ سے ملک کے دوسرے شہروں سے اسلام آباد کے شہریوں کا رابطہ منقطع رہا جبکہ دفاتر کے اوقات میں ملازمین پی ٹی سی ایل ٹیلفون کے ذریعے دوسرے شہروں میں اپنے پیاروں سے رابطے کرتے رہے اور دارلحکومت میں وزرات داخلہ کی ہدایت پر پاکستان ٹیلی کمیونیکیشن اتھارٹی (پی ٹی اے ) کی جانب سے موبائل سروس رات گئے تک بندرکھی گئی ، موبائل سروس کی طویل بندش کے باعث شہریوں کو شدید مشکلات کا سامنا کرنا پڑا دور دارز شہروں سے آئے ہوئے لوگ اپنے مطلوبہ افراد سے ملاقات کے لیے رابطہ کرنے سے قاصر رہے ، بعض شہریوں کو راستوں کی معلومات حاصل کرنے میں شدی دشواری کا سامنا رہا۔