اسلام آباد (نیوزڈیسک) وزیراعظم نوازشریف وہ واحد شخصیت ہیں جو مختلف ادوار میں پاکستان کے تین بار وزیراعظم منتخب ہو چکے ہیں اور انہوں نے اپنے دور حکومت میں سات چیف آف آرمی سٹاف کے ساتھ بطور وزیراعظم کام کیا۔ نواز شریف نے نومبر 1990 میں حکومت سنبھالی تو اس وقت جنرل اسلم بیگ چیف آف آرمی سٹاف تھے ان کے بعد آصف نواز جنجوعہ 16اگست 1991میں پاک فوج کے سربراہ بنے، جنرل عبدالوحید کاکڑ12جنوری 1993کو آرمی چیف بنے، چند ہی مہینوں بعد جولائی میں نوازشریف کی حکومت ختم ہو گئی۔جنرل جہانگیر کرامت نے جنوری 1996میں پاک فوج کے سربراہ کا منصب سنبھالا اور وزیراعظم نوازشریف نے بھی کچھ عرصہ کے بعد فروری 1997میں دوبارہ حکومت بنائی۔ اکتوبر 1998میں جنرل جہانگیر کرامت سے استعفیٰ لیا اور جنرل پرویز مشرف کو چیف آف آرمی سٹاف تعینات کیا لیکن ایک بار پھر نوازشریف کی حکومت اپنی مدت پوری نہ کر سکی ، جنرل پرویز مشرف نے اکتوبر 1999 میں نوازشریف کی حکومت کا تختہ الٹ دیا۔وزیراعظم نوازشریف 11مئی 2013کے عام انتخابات میں کامیا ب ہوئے اور تیسری بار پاکستان کے وزیراعظم بننے کا اعزاز حاصل کیا، جس وقت نوازشریف نے حکومت سنبھالی تو جنرل اشفاق پرویز کیانی چیف آف آرمی سٹاف تھے اور ان کے نومبر 2010میں ریٹائر ہونے کے بعد جنر ل راحیل شریف پاک فوج کے سربراہ منتخب ہوئے جو رواں سال نومبر میں ریٹائر ہو رہے ہیں۔