کراچی(نیوزڈیسک)کراچی آپریشن ،رینجرز نے عوام سے بڑی اپیل کردی . ڈی جی رینجرز سندھ میجر جنرل بلال اکبرنے کہاہے کہ کراچی آپریشن میں عوام کا بھرپور تعاون رہاہے اور اسے منطقی انجام تک پہنچا کرہی دم لیں گے۔ آپریشن کے مثبت نتائج کے ساتھ عوامی تعاون بڑھ رہا ہے، ۔انہوں نے عوام سے اپیل کی کہ وہ غیر قانونی تارکین وطن پر کڑی نظر رکھیں۔ہفتہ کوسینیٹر شاہی سید کی قیادت میں پختون جرگے نے رینجرز ہیڈ کوارٹر کراچی میں میجر جنرل بلال اکبر سے ملاقات کی ۔ ملاقات میں ڈپٹی ڈائریکٹر سندھ رینجرز، سیکٹر کمانڈرز اور دیگر افسران بھی موجود تھے۔ ملاقات کے دوران جرگے کے 100 رکنی وفد نے رینجرز کے امن و عامہ کے قیام میں کردار کو سراہا ۔ملاقات کے دوران ڈی رینجرز میجر جنرل بلال اکبرنے کہاکہ کراچی میں امن و امان میں جہاں رینجرز کا کردار ہے وہیں عوام نے بھی بھرپور ساتھ دیاہے۔ شہری جرائم میں ملوث عناصر کی نشان دہی ہیلپ لائن پر کررہے ہیں جس کے مثبت نتائج حاصل ہوئے ہیں اور اب عوام کا تعاون مزید بڑھ رہا ہے۔انہوں نے کہاکہ عوام کی مدد سے ہی ٹارگٹ کلرز، بھتہ خوروں اور دیگر جرائم میں ملوث افراد کے خلاف بھرپور کارروائی کی گئی۔ کراچی آپریشن بلا امتیاز رنگ و نسل کیا جارہا ہے اور اسے منطقی انجام تک پہنچا کر ہی دم لیں گے۔نہوں نے ایک بار پھر عوام سے اپیل کرتے ہوئے کہا کہ عوام غیر قانونی تارکین وطن پر نظر رکھیں۔