لاہور (نیوزڈیسک)ا سپیکر قومی اسمبلی سردار ایاز صادق نے کہا کہ حکومت کی ٹانگیں کھینچنے والے ایکسپوز ہو چکے ہیں ،اب انہیں چاہیے کہ ہمیں کام کرنے دیں ، وزیراعظم اور وزیر داخلہ کے درمیان کوئی سازشی عنصر موجود نہیں ، وفاقی وزیر داخلہ اوروزیراعلیٰ سندھ جب مل کر بیٹھیں گے تو تمام مسائل کو خوش اسلوبی سے حل کرلیں گے ،پنجاب میں آپریشن کا فیصلہ وفاقی وزارتِ داخلہ اور وزیراعلیٰ پنجاب محمد شہباز شریف کریں گے۔ ان خیالات کااظہار انہو ں نے گڑھی شاہومیں مسلم لیگ (ن )کے رہنما حافظ ایوب کے چچا اور والد کی فاتحہ خوانی کے بعد میڈیا سے گفتگو کے دوران کیا ۔ انہوں نے کہاکہ عمران خان نے مجھے نئے سال کی مبارکباد نہیں دی لیکن میں میڈیا کے توسط سے ان کو بھی اور پورے ملک کو بھی نئے سال کی مبارکبا د دیتا ہوں، نئے سال کے اہداف پورے کرنے کیلئے ہم سب کو اختلافات بھلا کر اور مل جل کر چلنا چاہیے ،امید کرتا ہوں کہ نیا سال پاکستان اور پوری امت مسلمہ کیلئے بہتر ثابت ہوگا ۔ انہوں نے کہا کہ ہماری ٹانگیں کھینچنے والے ایکسپوز ہوچکے ہیں ان کو کچھ نہیں ملا ،انہیں چاہیے اب ہمیں کام کرنے دیں ۔ انہوں نے کہاکہ وفاقی وزیر داخلہ مڈل وکٹ پر زیادہ باؤلنگ کرتے ہیں ،ان کے اور وزیراعظم کے مابین کو ئی سازشی عنصر موجود نہیں ہے، سندھ میں رینجرز اختیارات کے حوالے سے جب وزیراعظم، وزیرا علیٰ سندھ اور وفاقی وزیر داخلہ مل کر بیٹھیں گے تو تمام مسائل کا حل خوش اسلوبی سے نکال لیں گے ۔ انہوں نے کہاکہ وفاقی حکومت کو قومی اسمبلی میں اردوکے نفاذ کیلئے ابھی کچھ وقت لگے لگا کیونکہ ہمیں اس کیلئے مترجم اور دیگر وسائل درکار ہیں جس پر کام ہورہاہے لیکن فی الحال لوگوں کی سہولت کیلئے قومی اسمبلی کی کاروائی انگریزی اور اردو دونوں زبانوں میں جاری ہیں ۔اردوزبان کے نفاذ کا بل جنہوں نے پیش کیا ہے یہ ان کا کام ہے اب اس کو آگے لیکر چلیں اور تمام متعلقہ فورم پر آواز اٹھائیں میں ان کے ساتھ ہوں ۔