کراچی(نیوزڈیسک) وزیر اعلیٰ سندھ قائم علی شاہ کی منظوری کے بعد جاری ہونے والے نوٹیفکیشن کے مطابق ڈاکٹر عاصم کیس کے اسپیشل پبلک پراسیکیوٹر مشتاق جہانگیری کو تبدیل کر کے نثار احمد درانی کو اسپیشل پبلک پراسیکیوٹر بنا دیا گیا ہے۔ گزشتہ روز رینجرز کی جانب سے سندھ ہائی کورٹ میں درخواست دی گئی تھی کہ سندھ حکومت کو اس کیس میں پراسیکیوٹر مشتاق جہانگیری کو تبدیل کرنے سے روکا جائے۔ جبکہ مشتاق جہانگیری بھی اس سلسلسے مین عدالت سے پہلے ہی رجوع کر چکے ہیں۔ رینجرز حکام کا مو¿قف ہے کہ حکومت سندھ ڈاکٹر عاصم کو بے گناہ قرار دینے کے لئے دباو¿ ڈال رہی ہے۔ پہلے جب مقدمہ چالان کی اسٹیج پر پہنچا تو حکومت نے بد نیتی کا مظاہرہ کرتے ہوئے تفتیشی افسر کو تبدیل کر دیا اور نئے تفتیشی افسر نے بغیر کسی تفتیش کے ڈاکٹر عاصم کو بے گناہ قرار دے دیا۔ دوسری جانب ڈاکٹر عاصم کیس کے نامزد ہونے والے نئے اسپیل پبلک پراسیکیوٹر نثار احمد درانی کا کہنا ہے کہ وہ بغیر کسی دباو¿ کے قانون کے مطابق کام کریں گے۔ ڈاکٹر عاصم کیس کے تفتیشی افسر ڈی ایس پی الطاف حسین نئے پراسیکیوٹر کے ہمراہ پیر کے روز مقدمے کا چالان انسداد دہشت گردی کورٹس کے منتظم جج جسٹس نعمت اللہ پھلپوٹو کے روبرو پیش کریں گے۔