کابل(نیوزڈیسک)افغان حکومت نے پاکستان کے وزیردفاع خواجہ آصف کے اس بیان کی مذمت کی جس میں انہوں نے ترکمانستان سے افغانستان کے راستے پاکستان اوربھارت جانیوالی گیس پائپ لائن کی حفاظت کیلئے افغان طالبان پراپنے اثرورسوخ کے استعمال کرنے کی بات کی تھی۔کابل میں اتوار کوافغان صدارتی محل سے جاری بیان میں کہاگیا کہ خواجہ آصف کابیان افغانستان کے اندرونی معاملات میں مداخلت تصورکیاجاتاہے اوراس طرح کے بیانات دونوں ممالک کے رہنماﺅں کے عدم مداخلت کی پالیسی سے متصادم ہیں ۔یادرہے کہ خواجہ آصف نے ہفتے کو بی بی سی کے ساتھ ایک انٹرویو میں کہاتھا کہ گیس منصوبہ پاکستان سمیت دیگرممالک کیلئے اہم ہے اور اس کی سیکیورٹی کیلئے پاکستان افغان طالبان پراپنااثرورسوخ استعمال کرسکتاہے۔صدارتی محل کے بیان میں کہاگیاکہ افغانستان کی سیکیورٹی فورسزاپنے علاقے کی تقریباً700کلومیٹر پائپ لائن کے تحفظ کی صلاحیت رکھتی ہیں بیان میں حکومت پاکستان سے مطالبہ کیاگیا ہے کہ ایسے بیانات سے گریز کیاجائے جس سے دونوں ممالک کے درمیان بداعتمادی پیدا ہوسکتی ہے۔بیان میں الزام لگایا گیا ہے کہ پاکستانی وزیردفاع کے بیان اس بات کی نشاندہی کرتا ہے کہ پاکستان کے کچھ اہلکار اور رہنما اب بھی افغانستان کے اندرونی معاملات میں مداخلت میںدلچسپی رکھتے ہیں۔