پشاور(نیوزڈیسک) لو آگئی تبدیلی۔۔۔خیبرپختونخوا میں ایک اور قابل تحسین اقدام،وزیراعلیٰ خیبرپختونخوا پرویز خٹک نے صوبے کے ہر ضلع میں یونیورسٹی کیمپس قائم کرنے کا اعلان کرتے ہوئے کہا ہے کہ اتبدائی و ثانوی اور اعلیٰ تعلیم کا فروغ پاکستان تحریک انصاف کی قیادت میں موجودہ صوبائی حکومت کی سب سے پہلی ترجیح ہے وہ اتوار کے روز یہاں اسلامیہ کالج کے صد سالہ یوتھ فیسٹیول سے خطاب کر رہے تھے فیسٹیول سے پاکستان تحریک انصاف کے چیئرمین عمران خان نے بھی خطاب کیا جبکہ اسلامیہ کالج یونیورسٹی کے وائس چانسلر محمد اجمل خان نے اس موقع پر اپنے خطبہ استقبالیہ میں اسلامیہ کالج کی تاریخ، کامیابیوں اور سرگرمیوں پر تفصیلی روشنی ڈالی اور انہیں طالبان کے چنگل سے آزاد کرانے کے علاوہ کالج کی ترقی کیلئے صوبائی حکومت کی کوششوں اور اقدامات کو خراج تحسین پیش کیا سپیکر خیبرپختونخوا اسمبلی اسد قیصر، صوبائی وزراءمحمد عاطف خان، شاہ فرمان، امتیاز شاہد قریشی، وزیراعلیٰ کے مشیر اشتیاق ارمڑ ، معاون خصوصی برائے اطلاعات و اعلیٰ تعلیم مشتاق احمد غنی، اراکین اسمبلی، اسلامیہ کالج سینئر ایلومنائی کے صدر اور سابق گورنر علی محمد جان اورکزئی، کالج کی فیکلٹی اور طلبہ کی کثیر تعداد نے یوتھ میلے میں شرکت کی میلے کا اہتمام اسلامیہ کالج کے صدسالہ جشن کی اختتامی تقریب کے طور پر کیا گیا تھا اپنے مختصر خطاب کے آغاز میں وزیراعلیٰ پرویز خٹک نے اتوار کے روز پاڑہ چنار میں ہونے والے بم دھماکے کی مذمت کرتے ہوئے دھماکے میں شہید ہونے والے افراد کے لواحقین سے تعزیت اور ہمدردی کا اظہار کیا وزیراعلیٰ نے تعلیمی شعبے پر بات کرتے ہوئے کہاکہ ان کی صوبائی حکومت تعلیم کے شعبہ کیلئے تمام مطلوبہ مالی وسائل فراہم کرنے کیلئے پرعزم ہے وزیراعلیٰ نے بتایا کہ گزشتہ ڈھائی سال کے دوران موجودہ صوبائی حکومت نے صوبے میں 50 نئے ڈگری کالج، جن میں سے بیشتر خواتین کیلئے ہیں، ایک ٹیکنکل یونیورسٹی ، تین دیگر یونیورسٹیاں، دو وومن یونیورسٹیاں اور دو میڈیکل کالج شروع کئے ہیں ، وزیراعلیٰ نے اس موقع پر کالج کے سٹاف کیلئے ایک ماہ کی تنخواہ کے برابر بونس کا اعلان بھی کیا ۔