اسلام آباد(نیوز ڈیسک)پی آئی اے پائلٹس کی تعداد پوری نہیں ہوئی جبکہ پائلٹ بھی احتجاج چھوڑنے پر راضی نہیں،آج اس جھگڑے کے ساتویں دن بھی کئی پروازیں منسوخ ہونے کا خدشہ ہے۔سول ایوی ایشن نے بیماری کا کہہ کر چھٹی کرنے والے 21 پائلٹس سے تفتیش کیلئے بورڈ بنا دیا ، پالپا کہتی ہے اس پر انٹرنیشنل سول ایوی ایشن آرگنائزیشن سے شکایت کریں گے۔پالپا نے ہڑتال کی کال دی اور پی آئی اے کے21 پائلٹوں نے چھٹی کے لیے میڈیکل سرٹیفکیٹ بھجوا دیے۔پائلٹوں کی بیماری کیا ہے ، جسمانی اور نفسیاتی فٹنس کیسی ہے؟یہ جانچنے کے لیے سول ایوی ایشن اتھارٹی نے میڈیکل بورڈ تشکیل دے دیاہے۔ میڈیکل بورڈ نے پائلٹس کو 8 ، 12اور 19 اکتوبر کو طلب کر لیا ہے جبکہ میڈیکل بورڈ یہ گتھی بھی سلجھانا چاہتا ہے کہ 21 پائلٹس بیک وقت کیسے بیمار ہو گئے۔ پی آئی اے کے بیمار پائلٹس میں کیپٹن عبدالمتین، اورنگزیب حشمت خان، جرار ظفر،سید احسن عباس زیدی ، کیپٹن صلاح الدین جمال،محمد امان درانی،خرم مغل، ندیم مصور ، کیپٹن عمر راشد شامل ہیں۔ بیمار ہونے والے کو پائلٹس میں عثمان حیات ملک، ارتضٰی علی، عثمان رفیق چٹھہ ، زیب النساء، کامران خان، اسد الیاس، شہریار ڈوگر ، علی احمد سعید، صابرالرحمان ،افسر طحٰہ حارث انجم ، عاصم ضیاءاور زوہیب احمد شیخ شامل ہیں۔