راولپنڈی (نیوزڈیسک) کرنسی سمگلنگ کیس میں چار ماہ چار دن قید کے بعد رہائی پانے والی ماڈل ایان علی کی ضمانت منسوخی کیلئے کسٹم حکام نے سپریم کورٹ سے رجوع کرنے کا فیصلہ کیا ہے ۔ ماڈل کی ضمانت منظوری کیخلاف درخواست عیدالفطر کے بعد دائر کی جائے گی ۔ ذرائع نے بتایا ہے کہ ماڈل گرل ایان علی کی ضمانت منظوری کیخلاف کسٹم حکام نے سپریم کورٹ جانے کا فیصلہ کیا ہے ۔ کسٹم تفتیشی حکام نے قانونی ٹیم کے ساتھ مشاورت مکمل کر لی ۔ عید الفطر کی تعطیلات کے بعد کسٹم حکام ایان علی کی ضمانت منسوخی کی درخواست دائر کرینگے ، درخواست کیساتھ اہم شواہد بھی عدالت عظمیٰ کے سامنے رکھے جائیں گے ۔ ایان علی کو گزشتہ روز کرنسی سمگلنگ کیس میں ضمانت پر رہا کیا گیا ۔ کسٹم حکام نے چودہ مارچ کو بینظیر ایئرپورٹ سے ایان علی کو پانچ لاکھ ڈالر سمگل کرنے کی کوشش کے الزام میں گرفتار کیا تھا ۔ لاہور ہائیکورٹ نے چودہ جولائی کو ملزمہ کی درخواست منظور کی اور چار ماہ چار دن قید رہنے کے بعد گزشتہ روز ایان علی کو اڈیالہ جیل سے رہا کیا گیا تھا –