کراچی (نیوزڈیسک)اہم رہنماﺅں کی دھڑادھڑ تحریک انصاف میں شمولیت،پیپلزپارٹی کے صبر کا پیمانہ لبریز،سنگین الزام لگادیا،کہتے ہیں کہ مشرف کے مشوروں پر سرتسلیم خم کرنا عمران نیازی کی مجبوری ہے- بلاول ہائوس کراچی کے ترجمان اعجاز درانی نے کہا ہے کہ اپنوں کا مال لوٹنے والے غیروں کو کیا انصاف فراہم کریں گے۔ پی ٹی آئی لوٹے اور لٹیروں کا جمعہ بازار ہے۔ پی ٹی آئی میں شامل ہونے والے زیادہ تر افراد دوسری جماعتوں کے بھگوڑے ہیں۔ بلاول ہائوس سے جاری بیان میں اعجاز درانی نے کہا کہ عمران خان خود بھی پرویز مشرف کی ریفرنڈم چیمپئن لیگ کے اوپنر بیٹسمین ہیں۔ انہوں نے مشرف کو ملک وقوم کا نجات دہندہ کا لقب دیا تھا۔ انہوں نے کہا کہ مشرف دور کے اراکین پارلیمنٹ اور ناظمین آج عمران نیازی کی آنکھوں کے تارے بن گئے ہیں۔ مشرف کے مشوروں پر سر تسلیم خم کرنا عمران نیازی کی مجبوری ہے۔ اعجاز درانی نے مزید کہا کہ عاشقین مشرف عمران کو بھی چھوڑ کر پتلی گلی پکڑنے میں دیر نہیں لگائیں گے۔پی ٹی آئی کے لوٹے اور لٹیروں کا حشر بھی ضیاء اور مشرف کی مجلس شوریٰ جیسا ہوگا۔