کراچی (نیوزڈیسک) کالاباغ ڈیم، پیپلزپارٹی نے دھمکی دیدی،پاکستان پیپلز پارٹی سندھ سے تعلق رکھنے والے اراکین قومی اسمبلی میر منور علی تالپور، فقیر شیر محمد بالالانی اور عمران ظفر لغاری نے وزیراعظم میاں محمد نواز شریف کو خبردار کیا ہے کہ اگر انہوں نے انتہائی متنازعہ کالا باغ ڈیم کی تعمیر کے حوالے سے کسی بھی سمری کی منظوری دی تو یہ ن لیگ کیلئے خود کشی کے مترادف ہوگا۔پی پی پی میڈیا سیل سے جاری بیان میں انہوں نے کہا کہ سمری کی منظوری سے پہلے سے پریشانیوں میں گھرا ہوا ملک مزید افراتفری کا شکار ہوگا اور ملک کے تین صوبوں کی زمین میدان جنگ میں تبدیل ہوجائے گی۔ انہوں نے کہا کہ ماضی میں بھی جب جب کالا باغ ڈیم کے حوالے سے کوئی کوشش کی گئی تو ملک کے تین صوبوں، سندھ، خیبر پختونخواہ اور بلوچستان کے عوام سراپا احتجاج ہوئے کیونکہ تین صوبوں کی تمام چھوٹی بڑی سیاسی جماعتوں اور عوام کا ماننا ہے کہ کالا باغ ڈیم سے صرف پنجاب کو فائدہ ہوگا اور باقی تین صوبوں کی زراعت ختم ہوجائے گی۔ انہوں نے کہا کہ کالا باغ ڈیم کی صورت میں پنجاب کا پانی پر مکمل کنٹرول ہوگا اور شدید بارشوں اور سیلاب کی صورت میں پنجاب اپنی زرعی زمینوں کو بچانے کیلئے پانی کھول دے گا جس کی چابی پنجاب کے پاس ہوگی۔ انہوں نے کہا کہ ہونا تو یہ چاہئے تھا کہ کالا باغ ڈیم کے مردے کو اب تک دفن کردیا جاتا لیکن پہلے سے احساس محرومی میں مبتلا چھوٹے صوبوں کو تنگ کرنے کی خاطر کالا باغ ڈیم کا مسئلہ تازہ کیا جاتا ہے۔ انہوں نے کہا کہ ن لیگ کی اس وقت پنجاب اور مرکز میں حکومتیں ہیں لہذا ن لیگ کو چاہئے کہ وہ پانی کی ذخیرہ گاہوں اور پن بجلی کیلئے دوسرے متبادل ذرائع تلاش کرے اور ملک میں چھوٹے ڈیموں کا جال بچھایا جائے اگر ایسا نہ کیا گیا تو پورا ملک افراتفری کی زد میں آجائے گا اور عوامی احتجاج کی صورت میں پی پی پی سب سے آگے ہوگی۔