اسلام آباد (نیوزڈیسک)وفاقی وزیر اطلاعات ونشریات و قومی ورثہ سینیٹر پرویز رشید نے پاک بھارت وزراعظم کے درمیان ملاقات کو خوش آئند قرار دیتے ہوئے کہا ہے کہ دونوں ممالک کو تمام مسائل میز پر بیٹھ کر مذاکرات کے ذریعے حل کر نے چاہئیں .ہمسائیوں کو تبدیل نہیں کیاجاسکتا‘ ہمیں ماضی کی تلخیوں اور شکایتوں کو بھلانا ہوگا
دونوں ممالک کے درمیان کرکٹ کے علاوہ ہاکی , فٹ بال اور کبڈی کے میچز بھی کھیلے جانے چاہئیں ۔ ایک انٹرویو میں پرویز رشید نے کہاکہ برصغیر پاک وہند کے مسائل کا بہترین حل مذاکرات ہی ہیں‘ پاکستان اور بھارت کو چاہئے کہ وہ اپنے تمام معاملات اور مسائل میز پر بیٹھ کر مذاکرات سے حل کریںوفاقی وزیر نے کہا کہ گزشتہ ایک سال میں ورکنگ باﺅنڈری پر بہت سے واقعات ہوئے ہیں جن میں کئی شہادتیں بھی ہوئی ہیں‘ ہم ہمسائے ہیں اور ہمسائیوں کو تبدیل نہیں کیاجاسکتا‘ ہمیں ماضی کی تلخیوں اور شکایتوں کو بھلانا ہوگا تاکہ مزید آگے بڑھ سکیں۔ سینیٹر پرویزرشید نے مزید کہا کہ ہمیں پچھلے 65 سالوں کے زخموں کو کریدنے کی بجائے مثبت سوچ کو اپنانا ہوگا اور یہی ہمارے لئے بہتر ہے‘ دونوں ملکوں کو چاہئے کہ بقائے باہمی کے اصول کے مطابق رہنا سیکھیں اور عدم مداخلت کے اصول پر کار فرما ہوں۔ ایک سوال کا جواب دیتے ہوئے انہوں نے کہا کہ وزیراعظم نوازشریف اور نریندر مودی کی ملاقات بھارتی حکومت کی خواہش پر ہو ئی تاہم ایک ملاقات میں سال بھر کے دکھ دور نہیں کیے جاسکتے‘ پاکستان اور بھارت ذمہ دار ملک ہیں اس لئے ضروری ہے کہ مل بیٹھ کر مسائل کا حل نکالا جائے۔ ایک اور سوال کے جواب میں وفاقی وزیر کا کہنا تھا کہ مقبوضہ کشمیر میں دہلی سرکار کی چلتی ہے نہ کہ مقبوضہ کشمیر حکومت کی۔ مقبوضہ کشمیر میں قابضین بھارتی افواج کے خلاف روز احتجاج ہوتا ہے‘ کشمیری دنیا بھر میں بھارتی فوج کے خلاف آواز بلند کرتے ہیں۔ سینیٹر پرویزرشید نے کہا کہ بھارت میں عام انتخابات میں ووٹ حاصل کرنے کی مہم بھی پاکستان دشمنی کی بنیاد پر چلائی جاتی ہے ۔بھارت اور پاکستان کی کرکٹ ٹیموں کی سیریز کے حوالے سے پوچھے گئے سوال کے جواب میں انہوں نے کہا کہ دونوں ملکوں کے مابین نہ صرف کرکٹ بلکہ ہاکی، فٹ بال اور کبڈی کے میچز بھی کھیلے جانے چاہئیں۔