لاہور (نیوزڈیسک)لیبر ویلفیئر فیڈریشن آف پاکستان،پاکستان نیشنل ٹریڈ یونینز فیڈریشن اورانٹرنیشنل یوتھ اینڈ ورکرز موومنٹ کے زیرِ اہتمام محنت کشوں کے عالمی دن کی مناسبت سے شملہ پہاڑی سے چیئرنگ کراس تک ریلی نکالی گئی۔نامور گلوکار اور بانی رہنما‘‘ انٹرنیشنل یوتھ اینڈ ورکرز موومنٹ جواد احمد، صدر لیبر ویلفیئرفیڈریشن آف پاکستان محمد عمر سلیمی ،جنرل سیکرٹری محسن الیاس اور دیگر قائدین نے خطاب کرتے ہوئے محنت کشوں کو خراجِ عقیدت پیش کیا۔ جوا د احمد نے کہاکہ سرمایہ دارانہ نظام اپنا وقت پورا کر چکا ہے کیونکہ یہ نظام اپنی پناہ میں رہنے والے کو زندگی کی ضمانت دینے میں ناکام ہوگیا ہے ، اس نظام کو بدلنے کی ضرورت ہے ،محنت کش خود ایک طاقت ہیں دنیا میں اب تک جتنے بھی انقلاب رونما ہوئے وہ محنت کشوں کی منظم طاقت سے ہی ہوئے۔ عمر سلیمی نے کہا کہ ہم محنت کشوں کے مسائل کے حل کیلئے اپنی پوری توانائی، طاقت اورجوش و جذبے کوبروئے کار لاتے ہوئے ایک منظم اور بڑی تحریک بنا ئیں گے۔