اسلام آباد(نیوز ڈیسک) وائس چیئرمین پاکستان تحریک انصاف شاہ محمود قریشی نے کہا ہے کہ پی ٹی آئی کی پارلیمنٹ میں جانے سے ن لیگ کے کچھ لوگوں کو بہت تکلیف ہوتی ہے ہمارا اسمبلیوں سے بائیکاٹ جوڈیشل کمیشن کے قیام تک تھا جوڈیشل کمیشن کے قیام کے بعد پارلیمنٹ سے باہر رہنے کا کوئی جواز نہیں تھا ۔ تحریک انصاف نے عام انتخابات میں دھاندلی کے ثبوت جوڈیشل کمیشن میں جمع کرا دیئے ہیں دھاندلی ثابت ہو گئی تو وزیر اعظم کو اسمبلی تحلیل کرنی ہو گی ۔ دھاندلی ثابت ہونے کے بعد یہ سال الیکشن کا ہو گا حکومت کو راہ فرار نہیں اختیار کرنے دیں گے ۔ بدھ کے روز یہاں میڈیا سے گفتگو کرتے ہوئے انہوں نے کہا ہے کہ ہم نے جو ثبوت جوڈیشل کمیشن میں جمع کرائے ہیں ان پر مطمئن ہیں تھیلے کھلیں گے تو دودھ کا دودھ اور پانی کا پانی ہو جائے گا اصل ثبوت تھیلوں میں ہیں جب تک تھیلے نہیں کھلتے حقائق سامنے نہیں آئیں گے ۔ ذوالفقار مرزا سے متعلق پوچھے گئے سوال کے جواب سے گریز کرتے ہوئے شاہ محمود قریشی نے کہا کہ بہتر ہو گا اس سوال کا جواب آپ آصف علی زرداری سے پوچھیں انہوں نے کہا کہ این اے 246 میں ضمنی الیکشن سے ماحول تبدیل ہو گیا ہے اس بار کراچی میں صحیح معنوں میں الیکشن ہوئے ہیں ایم کیو ایم کو صحیح ووٹ پڑے ہیں اس سے قبل متحدہ کراچی میں اپنی مرضی سے ٹھپے لگاتی تھی انہوں نے کہا کہ کراچی میں پی ٹی آئی نے الیکشن لڑنے کا فیصلہ کر کے کراچی میں بھی الیکشن کا ماحول بنایا ۔ ن لیگ والے تو حکومت ہونے کے باوجود اپنا امیدوار نہیں کھڑا کر سکے شاہ محمود قریشی کا کہنا تھا کہ کے پی کے میں بارشوں سے بڑے پیمانے پر تباہی ہوئی ہے یہ اللہ کی طرف سے ہے لیکن ہم متاثرین کی بحالی کی بھرپور کوشش کر رہے ہیں صوبائی حکومت کے ساتھ ساتھ عمران خان ار ریحام خان بھی سنجیدگی سے اقدامات کر رہی ہیں ۔