اسلام آباد (نیوزڈیسک)پاکستان تحریک انصاف کے رہنما و رکن قومی اسمبلی شاہ محمود قریشی نے کہا ہے کہ سعودی عرب کے ساتھ ہمارے دیرینہ تعلقات ہیں -یمن کے معاملے پر پارلیمنٹ کی قرار داد اہم ہے - اس کی روح کے مطابق عمل کیا جائے - سعودی عرب سفارتکاری کے ذریعہ مسئلہ کے حل کی طرف بڑھ رہا ہے -امید ہے مسئلہ جلدحل ہوگا ۔ جمعرات کو پارلیمنٹ ہاﺅس کے باہر میڈیا سے گفتگو میں انہوں نے کہا کہ کراچی کے حلقہ این اے 246 کے ضمنی نتخابات میں رینجرز نے امن و امان کی صورتحال کو بہتر بنانے کے لئے بہتر طریقے سے خدمات سر انجام دے رہی ہے اور اچھے طریقے سے الیکشن کا مرحلہ دن بھر جاری رہا۔ انہوں نے کہا کہ تحریک انصاف سیاسی جمہوری عمل کو جاری و ساری رکھنے کے حق میں ہے، ضمنی الیکشن میں ایک فریق نے جیتنا اور دوسرے نے ہارنا ہوتا ہے۔ انہوں نے کہا کہ کراچی کے حالات اب بدل رہے ہیں، وہاں پر عوام کے پاس ایم کیو ایم کے علاوہ دوسرا راستہ نہ تھا، پاکستان تحریک انصاف نے عائشہ منزل پر ایم کیو ایم کے گھر میں جلسہ کر کے سب کو حیران کر دیا۔ پاکستان تحریک انصاف نے کھلے انداز میں انتخابی مہم چلائی۔ ایک سوال کے جواب میں انہوں نے کہا کہ سعودی عرب کے ساتھ ہمارے دیرینہ تعلقات ہیں، اب سعودی عرب نے بھی پاکستان کے موقف کو سمجھنے کی کوشش کی ہے۔ انہوں نے کہا کہ وزیراعظم کی سربراہی میں وفد سعودی عرب گیا ہے، شاہ محمود قریشی نے کہا کہ اب سعودی عرب سفارتکاری کے ذریعہ مسئلہ کے حل کی طرف بڑھ رہا ہے۔ انہوں نے کہا کہ پارلیمنٹ کی متفقہ قرارداد کے تحت سعودی عرب کا ساتھ دیا جائے گا۔