اسلا م آ با د( نیوز ڈیسک )منصوبہ بندی اور ترقی کے وفاقی وزیر احسن اقبال نے کہاہے کہ اقتصادی راہداری کے آغاز سے پاکستان اور چین کے درمیان جغرافیائی سیاسی تعلقات اب اقتصادی تعلقات میں تبدیل ہوچکے ہیں۔ اقتصادی راہداری منصوبہ نہ صرف پاکستان بلکہ چین جنوبی اور وسطی ایشیائی ریاستوں کی بھی تقدیربدل دے گا۔ایک نیوز چینل سے گفتگو کرتے ہوئے انہوں نے کہا کہ اقتصادی راہداری کے آغاز سے پاکستان اور چین کے درمیان جغرافیائی سیاسی تعلقات اب اقتصادی تعلقات میں تبدیل ہوچکے ہیں۔انہوں نے کہا کہ ملک میں جاری منصوبوں پر کام کرنے والے چینی انجینئروں کو مکمل تحفظ فراہم کیا جائے گا۔ایک سوال کے جواب میں وفاقی وزیر نے کہا کہ ایشیائی ترقیاتی بینک کی منظوری کے بعد چین کے تعاون سے Super Critical Technology کا استعمال کرتے ہوئے کوئلے سے بجلی پیدا کرنے والے منصوبے شروع کئے جارہے ہیں۔انہوں نے کہا کہ ان منصوبوں سے کوئی منفی ماحولیاتی اثرات مرتب نہیں ہوں گے کیونکہ یہ ٹیکنالوجی بین الااقوامی معیار کے مطابق ہے۔ایک اورسوال کے جواب میں انہوں نے کہا کہ بھارت کو علاقائی ترقی کے بڑے منصوبے پرپاکستان کوتنقید کانشانہ بنانے کی بجائے پاک چین اقتصادی راہداری کے بارے میں مثبت سوچ اپنانی چاہئے۔وفاقی وزیر نے کہا کہ پاکستان نے امریکہ کے ساتھ حالیہ معاہدوں سمیت بھارت کے بین الاقوامی برادری کے ساتھ تعلقات کے حوالے سے کبھی نقطہ چینی نہیں کی۔