دبئی( نیوز ڈیسک) پاکستان پیپلز پارٹی کے چیئرمین بلاول بھٹو زرداری اور شریک چیئرمین آصف علی زرداری کے درمیان دبئی میں ملاقات ہوئی جس میں ملک کی سیاسی صورتحال اور پارٹی امور پر تبادلہ خیال کیا گیا۔ ملاقات میں مشرق وسطیٰ اور خطے کی صورتحال پر مشاورت کی گئی۔ سابق صدر آصف علی زرداری نے بلاول بھٹو کو پارلیمنٹ کی قرارداد کے حوالے سے آگاہ کیا۔ پاکستان پیپلز پارٹی کے ترجمان کا کہنا ہے کہ پارٹی کے چیئرمین اور شریک چیئرمین نے فیصلہ کیا ہے کہ چیئرمین بلاول بھٹوزرداری پارٹی کی اوورسیز تنظیم کے ساتھ کام کریں گے اور پاکستان میں پارٹی کی دیگر قیادت کے ساتھ وقتاً فوقتاً رابطے کریں گے۔ بلاول بھٹو زرداری کا کہنا ہے کہ ان کے اپنے والد کے ساتھ کوئی اختلافات نہیں ہیں۔ وہ پارٹی کے نظریات اور مقاصد کے ساتھ ہیں اور اپنے والد کے ساتھ مل کر پارٹی کو متحرک کریں گے۔ انہوں نے کہا کہ وہ مناسب وقت پر پارٹی کی مکمل طور پر سیاسی قیادت کریں گے۔ پارٹی ترجمان کا کہنا ہے کہ چیئرمین اور شریک چیئرمین کے اختلافات کی قیاس آرائیوں کو دبئی میں دونوں رہنماو¿ں کی ملاقات کے بعد دم توڑ دینا چاہیے۔
