اسلام آباد (نیوز ڈیسک) اسلام آباد میں میڈیا سے گفتگو کرتے ہوئے عمران خان نے کہا کہ پوری اُمت مسلمہ آگ کی لپیٹ میں ہے۔ دشمن مسلمانوں کو آپس میں لڑانے کی سازش کر رہے ہیں۔ یمن کے تنازع پر پارلیمنٹ کے مشترکہ اجلاس میں شرکت کا فیصلہ پارٹی مشاورت سے ہوگا۔ پی ٹی آئی چیئرمین نے کہا کہ جوڈیشل کمشن کا قیام اصولی موقف کی جیت ہے۔ اس معاملے پر بیان بازی نہیں ہوگی۔ نادرا نے فزانزک شہادت سے چیک کرنا ہے کہ گزشتہ الیکشن میں دھاندلی ہوئی ہے یا نہیں۔ این اے 246 میں ضمنی انتخابات کے لئے رینجرز طلب کرنے کا مطالبہ کرتے ہوئے عمران خان نے کہا کہ ملک میں کہیں بھی نو گو ایریا نہیں ہونا چاہیئے۔ انہوں نے الطاف حسین کو میانوالی یا لاہور سے الیکشن لڑنے کی دعوت بھی دی۔ پی ٹی آئی چیئرمین نے پٹرولیم مصنوعات کی قیمتوں میں اضافے کی مذمت بھی کی۔ –