بنوں(نیوز ڈیسک) پاکستان تحریک انصاف کے چیئر مین عمران خان نے کہا ہے کہ 2015ء تبدیلی کا سال ہے ‘ کرپٹ حکمران چوریوں کیلئے باریاں لیتے تھے اب ذہن میں تبدیلی آ گئی ہے ‘ اب زمین پر بھی تبدیلی آئے گی ‘ اصل تبدیلی بلدیاتی انتخابات کے بعد آئے گی‘ جب لوگوں کے فیصلے پرویز خٹک یا عمران خان نہیں وہ خود کریں گے ‘کسی کو مسلح گروپ رکھنے کی اجازت نہیں‘ اے پی سی میں تمام جماعتوں نے اس پر اتفاق کیا تھاکہ سب برابر ہیں چاہے حکومت کا حصہ ہو یا اپوزیشن کا‘کھیلوں کا ایسا نظام لاؤنگا کوئی شکست نہیں دے سکے گا ‘ دنیا کے کھلاڑی جب ریٹائر ہونے کی عمر میں ہوتے ہیں پاکستانی کھیلنا شروع کرتے ہیں ۔ وہ ہفتہ کو بکاخیل کیمپ میں متاثرین سے خطاب کر رہے تھے۔ انہوں نے کہا کہ سیاسی شعور پر عوام کو مبارکباد دیتا ہوں۔126 دن کے دھرنے کی وجہ سے جوڈیشل کمیشن تشکیل دیا گیا ہے ۔ 1970ء کے علاوہ تمام انتخابات میں دھاندلی ہوئی اب جوڈیشل کمیشن سے پہلی بار دھاندلی کی تحقیقات ہوں گی ۔ اب ایک اسلامی اور فلاحی پاکستان بنے گا۔ انہوں نے کہا کہ بڑے بڑے حکمران وں نے اپنا سارا پیسہ باہر رکھا ہوا ہے عوام کو انصاف نہیں دیتے یہ لوگ اسلامی نہیں ہیں ہمارے نبی نے تو عدل اور انصاف پر معاشرہ بنایا تھا۔ اگر یہ حکمران اسلامی ہیں تو اپنا پیسہ باہر سے ملک میں لے کر آئیں اور دوسرو ں کو سرمایہ کاری کا کہنے کی بجائے خود سرمایہ کاری کریں۔ عمران خان نے کہا کہ کرپٹ حکمران چوری کیلئے باریاں لیتے ہیں اب 2015ء تبدیلی کا سال ہے جن لوگوں میں شعور ہوتا ہے وہ تعلیم اور انصاف مانگتے ہیں ۔ عمران خان نے کہا کہ خیبر پختونخواہ میں تبدیلی آ چکی ہے یہاں پر سب سے زیادہ پیسہ تعلیم پر خرچ کیا جا رہا ہے۔ ٹمبر مافیا کے خلاف مہم عروج پر ہے۔ ہسپتالوں کی حالت بھی بدل رہے ہیں۔ پولیس کا نظام تمام صو بوں سے بہتر ہے لیکن اصل تبدیلی بلدیاتی انتخابات کے بعد آئے گی۔ جب لوگ اپنے فیصلے خود کریں گے ان کے فیصلے پرویز خٹک یا عمران خان نہیں کریں گے ۔ تحریک انصاف کے چیئرمین نے کہا کہ مجھے پتہ ہے کہ عوام کرکٹ کی وجہ سے بہت مایوس ہے ہم دنیا کا بہترین کھیلوں کا نظام پاکستان میں لے کر آئیں گے او رہر یونین کونسل کی سطح تک گراؤنڈ بنائیں گے۔ پاکستان میں مصباح الحق نے 34 سال کی عمر میں کھیلنا شروع کیا۔ عرفان 7 فٹ لمبا ہے اس نے 32 سال کی عمر میں کھیلا۔ دوسرے ممالک کے کھلاڑیوں کے ریٹائر منٹ کا جب وقت ہوتا ہے پاکستانی اس ٹائم کھیلنا شروع کرتے ہیں۔