اسلام آباد (نیوز ڈیسک) پشاور بورڈ آف انٹرمیڈیٹ اینڈ سیکنڈری ایجوکیشن نے سالانہ میٹرک امتحانات 2026 کے نتائج جاری کر دیے ہیں، جن میں اسلامیات کا مضمون طلبہ کے لیے سب سے زیادہ مشکل ثابت ہوا۔
رپورٹ کے مطابق نویں اور دسویں جماعت کے نتائج کا جائزہ لینے سے معلوم ہوا کہ سب سے زیادہ ناکامیوں کا تناسب اسلامیات کے مضمون میں سامنے آیا، جہاں تقریباً 10 ہزار طلبہ کامیابی حاصل نہ کر سکے۔
اعداد و شمار کے مطابق نویں جماعت کے امتحانات میں مجموعی طور پر 97 ہزار 950 طلبہ نے حصہ لیا۔ ان میں سے 57 ہزار 847 طلبہ مطلوبہ معیار پر پورا اترتے ہوئے دسویں جماعت میں ترقی حاصل کرنے میں کامیاب رہے۔
تعلیمی حلقوں کا کہنا ہے کہ نتائج کے بعد اسلامیات کے مضمون میں طلبہ کی کمزور کارکردگی کی وجوہات کا جائزہ لیا جا رہا ہے تاکہ آئندہ امتحانات میں اس صورتحال کو بہتر بنایا جا سکے۔ بورڈ حکام نے بھی طلبہ اور اساتذہ پر زور دیا ہے کہ مضمون کی تیاری پر خصوصی توجہ دی جائے تاکہ مستقبل میں کامیابی کی شرح میں اضافہ ہو سکے۔
