اسلام آباد (نیوز ڈیسک) کامرہ کے نزدیک نیشنل ہائی وے پر پیش آنے والے افسوسناک حادثے میں نیشنل ہائی ویز اینڈ موٹروے پولیس کے
ایک سب انسپکٹر ڈمپر کی زد میں آ کر جان کی بازی ہار گئے۔ واقعے کی سی سی ٹی وی فوٹیج بھی سامنے آگئی ہے، جس میں حادثے کے مناظر ریکارڈ ہوئے ہیں۔
فوٹیج میں دیکھا جا سکتا ہے کہ ڈیوٹی انجام دینے والے پولیس افسر کو ڈمپر روند دیتا ہے۔ ویڈیو دیکھنے والوں کے مطابق بظاہر ایسا محسوس ہوتا ہے کہ ڈرائیور نے بروقت گاڑی روکنے کی کوشش نہیں کی۔ حادثے کے فوراً بعد موٹروے پولیس کے اہلکار ڈمپر کے تعاقب میں دوڑتے بھی نظر آتے ہیں، جبکہ جائے وقوعہ پر ایک اور ڈمپر بھی موجود تھا۔
موٹروے پولیس کے مطابق زخمی افسر کو فوری طور پر تحصیل ہیڈکوارٹر اسپتال حضرو منتقل کیا گیا، تاہم وہ دورانِ علاج زخموں کی شدت کے باعث دم توڑ گئے۔ شہید ہونے والے افسر کی شناخت سب انسپکٹر جاوید اکبر (جاوید شنواری) کے نام سے ہوئی ہے۔
ابتدائی تحقیقات میں بتایا گیا ہے کہ حادثہ ڈمپر ڈرائیور کی مبینہ غفلت اور لاپروائی کے نتیجے میں پیش آیا۔ واقعے کے بعد ڈرائیور موقع سے فرار ہونے میں کامیاب ہوگیا، تاہم ڈمپر میں موجود ہیلپر کو حراست میں لے لیا گیا ہے اور قانونی کارروائی جاری ہے۔
ذرائع کے مطابق شہید سب انسپکٹر کا تعلق مردان سے تھا۔ وہ اپنے پس ماندگان میں اہلیہ اور پانچ بچوں کو سوگوار چھوڑ گئے ہیں۔
دوسری جانب انسپکٹر جنرل نیشنل ہائی ویز اینڈ موٹروے پولیس، سلطان احمد چودھری نے واقعے پر گہرے رنج و غم کا اظہار کرتے ہوئے شہید افسر کی خدمات کو خراجِ عقیدت پیش کیا اور متعلقہ حکام کو واقعے کی مکمل تحقیقات کرکے ذمہ داروں کے خلاف سخت قانونی کارروائی کی ہدایت دی۔
