اسلام آباد (نیوز ڈیسک ) جمعیت علمائے اسلام (ف) کے سربراہ مولانا فضل الرحمان کے حالیہ متنازع بیان کے معاملے پر عدالتی کارروائی کا آغاز ہو گیا ہے۔

گوجرانوالہ کی ایک عدالت نے انہیں آئندہ سماعت کے لیے طلب کرتے ہوئے 28 جولائی کو پیش ہونے کا حکم دیا ہے۔ایڈیشنل سیشن جج کی عدالت میں یہ درخواست سینئر وکیل منظور قادر کی جانب سے دائر کی گئی، جس میں مؤقف اختیار کیا گیا کہ مولانا فضل الرحمان نے اپنے بیان میں قومی سلامتی کے اداروں سے متعلق متنازع گفتگو کی، جس پر قانونی کارروائی کی ضرورت ہے۔دوسری جانب لاہور میں بھی اسی معاملے پر سیشن عدالت سے رجوع کیا گیا ہے۔

درخواست گزار نے عدالت سے استدعا کی ہے کہ مولانا فضل الرحمان کے خلاف مقدمہ درج کرنے کا حکم جاری کیا جائے۔درخواست میں مؤقف اپنایا گیا ہے کہ مذکورہ بیان سے عوامی جذبات مجروح ہوئے اور شہداء کے اہلِ خانہ کی دل آزاری ہوئی، لہٰذا قانون کے مطابق ان کے خلاف مقدمہ درج کرنے کی ہدایت دی جائے۔