مکو آ نہ (این این آئی)فیصل آباد کے تھانہ مدینہ ٹان کے علاقے ہمت پورہ سے ایک نہایت افسوسناک اور تشویشناک واقعہ سامنے آیا ہے،

جہاں معصوم بچوں اور بچیوں کی مبینہ طور پر قابل اعتراض ویڈیوز بنا کر انہیں بلیک میل کرنے کے الزام میں ملزم کلیم کو پولیس نے گرفتار کر لیا ہے۔ذرائع کے مطابق ملزم کے موبائل فون سے 100 سے زائد مبینہ قابل اعتراض ویڈیوز برآمد ہوئی ہیں، جنہیں پولیس نے تحویل میں لے کر مزید تفتیش شروع کر دی ہے۔ متاثرین کا کہنا ہے کہ ملزم عرصہ دراز سے معصوم بچوں اور بچیوں کو بلیک میل کرتا رہا۔ واقعہ منظرِ عام پر آنے کے بعد متعدد درخواستیں متعلقہ تھانے میں جمع کروائی جا چکی ہیں، تاہم متاثرین کا الزام ہے کہ ابھی تک اس معاملے میں موثر کارروائی نہیں کی جا رہی۔متاثرہ خاندانوں نے مطالبہ کیا ہے کہ مقدمے کی تفتیش کرائم کنٹرول ڈیپارٹمنٹ (CCD) کے سپرد کی جائے تاکہ غیر جانبدارانہ اور شفاف تحقیقات کے ذریعے اگر مزید افراد بھی اس گھنانے جرم میں ملوث ہیں تو انہیں بھی قانون کے کٹہرے میں لایا جا سکے۔

حالیہ دنوں میں بچوں کے خلاف جرائم کے یکے بعد دیگرے سامنے آنے والے واقعات نے معاشرے میں شدید تشویش پیدا کر دی ہے۔ شہریوں کا کہنا ہے کہ ایسے واقعات اس بات کا تقاضا کرتے ہیں کہ بچوں کے تحفظ کے لیے قانون پر سختی سے عمل درآمد کیا جائے اور ایسے عناصر کو کسی قسم کی رعایت نہ دی جائے۔شہریوں نے وزیراعلی پنجاب، آر پی او فیصل آباد اور سی پی او فیصل آباد سے مطالبہ کیا ہے کہ اس حساس معاملے کا فوری نوٹس لیا جائے، متاثرین کو مکمل تحفظ فراہم کیا جائے، مقدمے کی شفاف تحقیقات یقینی بنائی جائیں، اور اگر الزامات ثابت ہوں تو ملزم اور اس کے ممکنہ سہولت کاروں کو قانون کے مطابق سخت ترین سزا دی جائےـ