اسلام آباد (نیوز ڈیسک)امریکی صدر ڈونلڈ ٹرمپ نے اپنے حالیہ بیان میں انتہائی سخت الفاظ استعمال کرتے ہوئے کہا ہے کہ ممکن ہے آج رات ایک پوری تہذیب تاریخ سے مٹ جائے۔
سوشل میڈیا پر جاری پیغام میں ٹرمپ کا دعویٰ تھا کہ ایران میں نظام حکومت میں بڑی تبدیلی آ چکی ہے اور اب وہاں نسبتاً کم شدت پسند سوچ رکھنے والے افراد موجود ہیں۔ ان کا کہنا تھا کہ آج کی رات غیر معمولی اہمیت کی حامل ہو سکتی ہے اور دنیا ایک بڑے اور فیصلہ کن لمحے کے قریب ہے۔انہوں نے مزید کہا کہ گزشتہ 47 برسوں سے جاری بدعنوانی، جبر اور تشدد کا باب اب اختتام کے قریب ہے۔ ٹرمپ کے مطابق امکان ہے کہ ایران کی جانب سے آج رات 8 بجے تک ردعمل سامنے آ سکتا ہے۔یاد رہے کہ ایران سے متعلق امریکی صدر کی جانب سے دی گئی تازہ مہلت پاکستانی وقت کے مطابق آج صبح 5 بجے ختم ہو رہی ہے، جبکہ اس سے قبل بھی وہ کئی بار مختلف ڈیڈ لائنز دے چکے ہیں۔
ابتدائی طور پر 21 مارچ کو ٹرمپ نے ایران کو 48 گھنٹوں کا وقت دیا تھا اور خبردار کیا تھا کہ اگر آبی راستہ نہ کھولا گیا تو توانائی کے منصوبوں کو نشانہ بنایا جائے گا۔ تاہم بعد ازاں انہوں نے بعض ممالک کے ساتھ مثبت بات چیت کا حوالہ دیتے ہوئے ممکنہ کارروائی کو پانچ دن کے لیے مؤخر کر دیا تھا۔
