اسلام آباد (نیوز ڈیسک)حکومتِ پاکستان نے اس سال 23 مارچ کو یومِ پاکستان کی مرکزی تقریبات نہ کرنے کا فیصلہ کیا ہے۔

وزیراعظم ہاؤس سے جاری بیان کے مطابق یہ فیصلہ ملک میں جاری کفایت شعاری مہم کے تحت کیا گیا ہے، جس کے باعث نہ تو پریڈ منعقد ہوگی اور نہ ہی اس سے متعلق دیگر بڑی تقریبات کا اہتمام کیا جائے گا۔

اعلامیے میں بتایا گیا ہے کہ یومِ پاکستان اس مرتبہ سادگی اور وقار کے ساتھ منایا جائے گا، جس میں صرف پرچم کشائی کی تقریبات تک محدود رکھا جائے گا۔ تمام وزارتوں، ڈویژنز اور سرکاری اداروں کو بھی ہدایت دی گئی ہے کہ وہ اس دن کو سادہ انداز میں منائیں۔

مزید کہا گیا ہے کہ 23 مارچ کے موقع پر کفایت شعاری پالیسی پر سختی سے عملدرآمد کو یقینی بنایا جائے گا۔ اس سے قبل حکومت نے یہ بھی اعلان کیا تھا کہ بیرونِ ملک پاکستانی سفارتی مشنز میں بھی یومِ پاکستان کی تقریبات محدود اور سادہ رکھی جائیں گی۔

نائب وزیراعظم اسحاق ڈار نے سوشل میڈیا پلیٹ فارم ایکس پر اپنے بیان میں کہا کہ اس سال تقریبات کو مختصر رکھا جائے گا اور صرف روایتی پرچم کشائی تک محدود رکھا جائے گا۔

انہوں نے اس امید کا اظہار بھی کیا کہ موجودہ علاقائی کشیدگی مذاکرات اور سفارتی کوششوں کے ذریعے جلد ختم ہوگی، جس کے بعد خطے میں امن اور استحکام بحال ہو سکے گا۔