اسلام آباد(این این آئی)توشہ خانہ 2 کیس کا تحریری فیصلہ میں کہاگیا ہے کہ بانی پی ٹی آئی عمران خان کو زیادہ عمر اور ان کی اہلیہ بشریٰ بی بی کو خاتون ہونے پر کم سے کم سزا دی گئی ہے ،استغاثہ اپنا مقدمہ ثابت کرنے میں کامیاب رہا اور دونوں ملزمان مجرمانہ خیانت کے مرتکب پائے گئے۔تحریری فیصلے میں کہا گیا کہ دونوں ملزمان پر جرم ثابت ہوا ہے، بانی پی ٹی آئی کو جرم ثابت ہونے پر دفعہ 409 کے تحت 10 سال سزا سنائی گئی جبکہ انسداد رشوت ستانی ایکٹ کے تحت انہیں 7 سال قید کی سزا سنائی گئی۔

تحریری فیصلے کے مطابق بشریٰ بی بی کو بھی 17 سال قید کی سزا سنائی گئی ہے اور مجرمان کو فی کس ایک کروڑ 64 لاکھ 25 ہزار 650 روپے جرمانہ عائد ہوا ہے اور جرمانہ کی عدم ادائیگی پر 6، 6 ماہ مزید قید کی سزا ہوگی۔تحریری فیصلے میں کہا گیا کہ بانی پی ٹی آئی کو زائد عمر اور بشریٰ بی بی کے خاتون ہونے پر کم سے کم سزا دی گئی۔تحریری فیصلے کے مطابق مجرموں کی عرصہ حوالات کو بھی سزا میں شامل کرلیا گیا ہے۔