اسلام آباد (این این آئی)اسلام آباد میں ڈپلومیٹک انکلیو میں واقع فلیٹ میں غیر ملکی سفارت کار کی لاش ملی ہے۔پولیس حکام کے مطابق لاش کی شناخت جرمن سفارت خانے کے سیکنڈ سیکریٹری تھامس فلڈر کے نام سے ہوئی ہے۔حکام نے بتایا کہ لاش پوسٹ مارٹم کے لیے ہسپتال منتقل کر دی گئی ہے اور اس ضمن میں تحقیقات جاری ہیں، سفارت کار کی موت کے حوالے سے جرمن سفارت خانے کو بھی اطلاع کر دی گئی ہے۔

پولیس حکام نے بتایا کہ سفارت کار کی موت کی وجہ کا تعین پوسٹ مارٹم رپورٹ کے بعد ہو گا، مذکور جرمن سفارت کار اس سے پہلے ایک مرتبہ معمولی ہارٹ اٹیک کا شکار ہوئے تھے۔پولیس کے مطابق2 دن قبل دفتر نہ پہنچنے پر جرمن سفارت خانے نے فلیٹ کا دروازہ توڑا تو سفار ت کار کو مردہ پایا گیا، جس کے بعد جرمن سفارت خانے کے عملے نے پولیس کو سفارت کار کے مردہ پائے جانے سے متعلق اطلاع دی۔