اسلام آباد (این این آئی)پی ٹی آئی کی سیاسی کمیٹی نے پھر 15اکتوبر پر ڈی چوک پر احتجاج کا اعلان کردیا ۔پی ٹی آئی کی سیاسی کمیٹی کے ہنگامی اجلاس کے بعد سیکرٹری اطلاعات شیخ وقاص اکرم کی جانب سے جاری اعلامئے میں کہا گیا ہے کہ 15اکتوبر کو اسلام آباد کے ڈی چوک میں بھرپور احتجاج کیا جائے گا جس کیلئے مرکزی کمیٹی سے لیکر علاقائی سطح تک تمام تنظیمی ذمہ داران اور ونگز کو تیاریوں کی ہدایت کردی گئی ہے۔
اعلامئے کے مطابق 15اکتوبر کو ڈی چوک کے پرامن احتجاج کی تیاریوں کے پیش نظر پنجاب کے اضلاع میں ہونیوالا احتجاج منسوخ کردیا گیا ہے جس کا اعلان بعد میں کیا جائے گا۔بیان کے مطابق سیاسی کمیٹی نے کہا ہے کہ مینڈیٹ چور اور آئین و قانون سے بیزار ناجائز حکمران ظلم اور سفاکیت ترک کرنے پر کسی طور آمادہ نظر نہیں آرہے، اڈیالہ میں ناحق قید بانی پی ٹی آئی عمران خان کو بطورِ خاص بربریت کے نئے سلسلے کا نشانہ بنایا جارہا ہے۔اعلامئے میں کہا گیا ہے کہ عمران خان کی زندگی، صحت اور سلامتی کو جان بوجھ کر سنگین خطرات سے دوچار کرنے کیلئے ان کے تمام بنیادی و انسانی حقوق سلب کئے گئے ہیں۔
