لاہور ( این این آئی) اسپیشل سینٹرل عدالت لاہور نے سابق وزیر اعلیٰ پنجاب و پاکستان تحریک انصاف کے مرکزی صدر چودھری پرویز الٰہی کی ضمانت منظور کرلی۔
ایف آئی اے نے سابق وزیراعلی پر منی لانڈرنگ کا مقدمہ درج کررکھا ہے۔ اسپیشل سینٹرل عدالت لاہور میں پی ٹی آئی کے صدر کی درخواست ضمانت کی سماعت ہوئی۔عدالت نے دونوں جانب سے وکلاء کے دلائل سننے کے بعد سابق وزیراعلی کی درخواست پر فیصلہ سناتے ہوئے پرویز الٰہی کی 10ہزار روپے کے مچلکوں کے عوض ضمانت منظور کرلی۔پرویز الٰہی نے درخواست ضمانت بعداز گرفتاری وکیل کی وساطت سے دائر کر رکھی تھی۔یاد رہے کہ 20جون کو اینٹی کرپشن عدالت نے پنجاب اسمبلی میں غیر قانونی بھرتیوں کے کیس میں پرویز الٰہی کی ضمانت منظور کی تھی، ایف آئی اے نے 20جون کو ہی پرویز الٰہی اور مونس الٰہی کے خلاف منی لانڈرنگ کا نیا مقدمہ درج کیا تھا۔ایف آئی اے کی جانب سے مقدمے میں کرپشن اور منی لانڈرنگ کے الزامات عائد کئے گئے تھے، مقدمے کے متن میں کہا گیا تھا کہ مونس الٰہی نے اپنے والد چودھری پرویز الٰہی کی معاونت سے کرپشن اور منی لانڈرنگ کی۔
