لاہو ر(این این آئی) پاکستان تحریک انصاف کے چیئرمین عمران خان نے 9مئی یا اس کے بعد درج مقدمات کے خلاف لاہور ہائیکورٹ میں درخواست دائر کر دی ہے، جس میں آئی جی پنجاب اور ایڈووکیٹ جنرل پنجاب کو فریق بنایا گیا ہے۔درخواست میں موقف اپنایا گیا ہے کہ پنجاب حکومت کی جانب سے گرفتاری کا خدشہ ہے، پنجاب حکومت کی جانب سے متعدد مقدمات میں نامزد کیا گیا ہے۔

درخواست میں کہا گیا کہ پنجاب حکومت سیاسی انتقام کا نشانہ بنا رہی ہے۔انہوں نے مقدمات کے خلاف دائر درخواست میں 9مئی یا اس کے بعد درج مقدمات کی تفصیلات فراہم کرنے کی استدعا کی ہے۔درخواست میں استدعا کی گئی کہ 9مئی یا اس کے بعد درج مقدمات میں گرفتار نہ کیا جائے۔واضح رہے کہ عمران خان کی گرفتای کے خلاف 9مئی کو ملک بھر میں پرتشدد مظاہروں نے جنم لیا تھا، جن میں کئی سول اور عسکری املاک کو نقصان پہنچایا گیا تھا۔

جس کے بعد قانون نافذ کرنے والے اداروں نے کئی مقدمے مظاہرین اور پی ٹی آئی قیادت کے خلاف درج کئے تھے۔نگراں پنجاب حکومت نے حالیہ ہنگامہ آرائی اور عسکری و سول تنصیبات میں توڑ پھوڑ اور جلاؤ گھیراؤ کی تحقیقات کے لیے جوائنٹ انوسٹی گیشن (جے آئی ٹی) بنانے کا فیصلہ کیا ہے جبکہ وزیر اعظم شہباز شریف نے بھی تمام شرپسندوں کو پکڑنے کے لئے 72گھنٹوں کا الٹی میٹم دیا ہے۔