لاہور( این این آئی)پاکستان تحریک انصاف کے گرفتار رہنما فواد چوہدری نے کہا ہے کہ پولیس ایسے لگائی گئی ہے کہ جیسے میں کوئی جیمز بونڈ ہوں،میرے خلاف جو مقدمہ درج ہوا ہے اس پر فخر ہے، نیلسن منڈیلا پر بھی یہی مقدمہ تھا۔رہداری ریمانڈ کے لئے عدالت میں پیشی کے موقع پر
گفتگو کرتے ہوئے فواد چوہدری نے کہا کہ کہا جا رہا ہے کہ میں نے بغاوت کی، میں سابق وفاقی وزیر اور سپریم کورٹ کا وکیل ہوں، مجھے عزت و احترام کے ساتھ ٹریٹ کیا جائے،مجھے جس طرح گرفتار کیا گیا وہ مناسب نہیں تھا، مجھے یہ فون کرتے میں خود ہی آ جاتا۔الیکشن کمیشن سے متعلق جو بات کی سارا پاکستان وہی بات کر رہا ہے۔مجھے بیان دینے پر ایسے گرفتار کیا گیا جسے میں کوئی دہشتگرد ہوں ۔مجھے یہ کہا گیا کہ آپ نے الیکشن کمیشن کی توہین کی جو بغاوت ہے، الیکشن کمیشن کے یہ رویے ہیں اور کہتے ہیںتنقید بھی نہ کریں ۔ملک میں جو بغاوت فرض ہے ،22کروڑ عوام نکلیں اور اس نظام سے بغاوت کریں ورنہ آپ کے بچے بھی اس نظام میں پس جائیں گے۔ آج عمران خان اور تحریک انصاف آپ کے حقوق کے لئے کھڑی ہے ، ہم لوگ جیلوں میں جارہے ہیں، کوئی مسئلہ نہیں یہ ہتھکڑیاں ہمارا زیور ہیں، ہم انشا اللہ تعالیٰ آزمائشوں پر پورا اتریں گے ، عوام پر فرض ہے کہ وہ باہر نکلیں اور اس نظام کو بدلنے میں اپنا حصہ ڈالیں۔
