اسلام آباد (این این آئی)الیکشن کمیشن آف پاکستان نے سیاسی جماعتوں کے مطالبے پر سینیٹ انتخابات کیلئے کاغذاتِ نامزدگی جمع کرانے کی تاریخ میں توسیع کر دی ہے۔ تفصیلات کے مطابق الیکشن کمیشن نے سیاسی جماعتوں کے مطالبے پر سینیٹ انتخابات کیلئے کاغذاتِ نامزدگی

جمع کرانے کی تاریخ میں توسیع کر دی ہے ۔ جاری اعلامئے کے مطابق سینیٹ کے انتخابات کیلئے کاغذاتِ نامزدگی اب 15 فروری تک جمع کرائے جا سکیں گے۔نامزد امیدواروں کی فہرست 16 فروری کو آویزاں کی جائے گی جبکہ کاغذاتِ نامزدگی کی جانچ پڑتال 17 اور 18 فروری کو ریٹرننگ افسران کے دفاتر میں ہوگی۔ریٹرننگ افسران کی جانب سے کاغذات نامزدگی منظور یا مستردکئے جانے کے فیصلوں کے خلاف ٹربیونل میں اپیل کرنے کی حتمی تاریخ 20 فروری2021 مقرر کی گئی ہے جبکہ ان اپیلوں کو نمٹانے کی آخری تاریخ 23 فروری 2021 مقرر ہے۔ ٹربیونل کے فیصلوں کی روشنی میں امیدواروں کی نظرثانی شدہ فہرست 24 فروری کو آویزاں کی جائے گی جبکہ کاغذات نامزدگی واپس لینے کی تاریخ 25 فروری 2021 مقرر ہے۔ سینیٹ کے انتخابات کیلئے پولنگ کے لیے پہلے سے مقرر کردہ تاریخ جو کہ 3 مارچ 2021 ہے اس میں کوئی ردوبدل نہیں ہو گا۔ الیکشن کمیشن آف پاکستان نے کہا ہے کہ امیدواروں کی

سہولت کیلئے کاغذاتِ نامزدگی جمع کرانے کی تاریخ میں توسیع کی گئی ہے۔الیکشن کمیشن نے کہا ہے کہ امیدواروں کو وقت کی کمی کے باعث قانونی تقاضے پورنے کرنے میں مشکلات کا سامنا تھا۔دوسری جانب پاکستان پیپلزپارٹی نے سینیٹ الیکشن شیڈول میں تبدیلی کے معاملے

پر الیکشن کمیشن سے وضاحت کا مطالبہ کرتے ہوئے کہا ہے کہ پیپلزپارٹی کو تاریخ میں توسیع دینے سے انکار کے ایک دن بعد توسیع کا فیصلہ کس کے دبائو میں آکر کیا گیا ؟، الیکشن کمیشن نے حکمران جماعت کیلئے سہولت کار بننے کیلئے کردار ادا کیا ہے،اقدامات سینیٹ انتخابات کو

متنازعہ بنا رہے ہیں۔پاکستان پیپلزپارٹی نے سینیٹ الیکشن شیڈول میں تبدیلی کے معاملے پر الیکشن کمیشن کے فیصلے پر سوالات اٹھاتے ہوئے وضاحت کا مطالبہ کیا ہے۔ پیپلز پارٹی کے سینئر رہنماء نیئر حسین بخاری نے ایک بیان میں کہا کہ الیکشن کمیشن کا شیڈول میں تبدیلی کا فیصلہ

شکوک شبہات کو جنم دیتا ہے۔ انہوں نے کہا کہ پیپلزپارٹی نے الیکشن کمیشن کو تاریخ میں توسیع کیلئے خط لکھالیکن الیکشن کمیشن نے تاریخ میں توسیع دینے سے انکار کردیا لیکن ایک روز بعد ہی تاریخ میں توسیع کردی گئی ۔نیئر بخاری نے کہا کہ الیکشن کمیشن بتائے کہ پیپلزپارٹی کو اگر

انکار کیا گیا تو پھر کس کے دبائو میں آکر تاریخ میں توسیع کی گئی؟۔ انہوں نے کہا کہ تحریک انصاف امیدواران کے ٹکٹوں کا حتمی فیصلہ نہیں کر سکی، اس لئے الیکشن کمیشن نے شیڈول میں تبدیلی کر کے حکمران جماعت کیلئے سہولت کار بننے کا کردار ادا کیا ہے۔ انہوں نے کہا کہ الیکشن کمیشن اس قسم کے اقدامات سے سینیٹ انتخابات کو متنازعہ بنا رہی ہے۔نیئر بخاری نے کہاکہ پیپلزپارٹی اس فیصلے پر شدید تحفظات کا اظہار اور وضاحت کا مطالبہ کرتی ہے۔