اسلام آباد(مانیٹرنگ ڈیسک)ویسٹ منسٹر کی عدالت نے فراڈ، منی لانڈرنگ اور فتنہ پردازی کے الزامات کا سامنا کرنے کیلئے ابراج کے بانی اور کاروباری شخصیت عارف نقوی کی تحویل کا حکم دیا ہے۔ روزنامہ جنگ میں مرتضیٰ علی شاہ کی شائع خبر کے مطابق ان

الزامات کی مجموعی سزا 3 سو سال قید ہے۔سینئر ڈسٹرکٹ جج ایما آربتھ نوٹ نے حکم دیا کہ پاکستانی تاجر کو امریکا کے حوالے کیا جائے اور امریکی جیل میں ان کی حفاظت اور حقوق کو کوئی خطرہ نہیں ہوگا جیسا کہ حوالگی کی سماعت کے دوران نقوی کے وکیل نے دلیل دی تھی۔ جب فیصلہ سنایا گیا تو عارف نقوی نے کسی جذبات کا اظہار نہیں کیا۔عارف نقوی کے وکیل لندن ہائیکورٹ میں حوالگی کے خلاف اپیل کریں گے۔ جب وہ فیصلے سے پہلے اپنے وکیلوں کے ساتھ عدالت پہنچے تو میڈیا سے بات نہیں کی لیکن عدالت سے رخصت ہوتے وقت انہوں نے صحافیوں سے خوشگوار تبادلہ خیال کیا۔ عارف مسعود نقوی پر 16 مقدموں میں دھوکا دہی کا الزام ہے اور متعلقہ منی لانڈرنگ کا ارتکاب 2014 اور 2018 کے درمیان کیا گیا تھا۔ امریکی حکومت نے انہیں “ایک ایسے مجرمانہ کاروباری رہنما کے طور پر بیان کیا ہے جس نے ابراج کو مصیبت میں ڈالا۔” جج نے قبول کیا کہ عارف نقوی کی ذہنی صحت سے متعلق مسائل ہیں۔

موضوعات:عارف نقوی