اسلام آباد ( آن لائن ) بلوچستان سے تعلق رکھنے والی سینیٹر کلثوم پروین کورونا کے باعث انتقال کر گئیں ۔ سینیٹر کلثوم پروین کے انتقال پر صدر مملکت ،وزیر اعظم ،چیئرمین سینٹ سمیت حکومتی اور اپوزیشن رہنمائوں کی جانب سے گہرے دکھ اور افسوس کا اظہار کیا گیا۔
بلوچستان سے تعلق رکھنے والی سینیٹر کلثوم پروین کورونا کے باعث اسلام آباد میں انتقال کر گئیں ۔مرحومہ گزشتہ دو ہفتہ سے کورونا کے مرض کے باعث وفاقی دارالحکومت کے نجی ہسپتال میں زیر علاج تھیں اور طبیعت بحالی بھی ہوئی تاہم پھر اچانک حالت بگڑنے کی صورت میں جانبر نہ ہو سکیں اور خالق حقیقی سے جا ملیں،اظہار تعزیت کرتے ہوئے اس موقع پر کہا گیا کہ دکھ کی اس گھڑی میں ہم ان کے خاندان کے دکھ میں برابر کے شریک ہیں۔سینٹر کلثوم پروین کے انتقال سے ایوان بالا ایک انتہائی فعال رکن اور پروگریسیو سوچ رکھنے والی مدبر سیاستدان سے محروم ہوگیا۔ انھوں نے نہ صرف بلوچستان میں پسماندہ طبقات کی بھر پور نمائندگی کی بلکہ ملکی سیاست میں بھی اہم کردار ادا کیاپاکستان ایک مخلص اور محنتی سیاستدان سے محروم ہو گیا۔ایوان بالا میں ان کے مثبت کردار اور عوام کے لئے انکی خدمات کو ہمیشہ یاد رکھا جائے گا ایوان بالا غمزدہ خاندان کے ساتھ دکھ کی اس گھڑی میں برابر کا شریک ہے،اللہ تعالیٰ مرحومہ کی مغفرت اور درجات بلند فرمائے۔صدر مملکت عارف علوی،وزیراعظم عمران خان ،چیئرمین سینٹ محمد صادق سنجرانی،وزیر داخلہ شیخ رشید،ڈپٹی چیئرمین قاسم سوری،پاکستان پیپلز پارٹی کے چیئرمین بلاول بھٹو زرداری اور پاکستان مسلم لیگ کے رہنمائوں کی جانب سے سینٹر کلثوم پروین کی وفات پر گہرے دکھ اور افسوس کا اظہار کیا گیا۔
