لاہور(این این آئی) لاہور کی احتساب عدالت نے پلاٹ الاٹمنٹ ریفرنس میں سابق وزیراعظم نواز شریف کے ناقابل ضمانت وارنٹ گرفتاری جاری کرتے ہوئے وزارت خارجہ کو لندن میں پاکستانی ہائی کمیشن کے ذریعے وارنٹ پر عمل درآمد کروانے کا حکم دے دیا۔

لاہور کی احتساب عدالت کے جج اسد علی نے سابق وزیراعظم نواز شریف سمیت دیگر کیخلاف غیر قانونی پلاٹ الاٹمنٹ ریفرنس کی سماعت کی۔ نیب کی طرف سے سپیشل پراسکیوٹر حارث قریشی پیش ہوئے اور استدعا کی کہ ملزم نواز شریف کے ناقابل ضمانت وارنٹ گرفتاری جاری کئے جائیں۔ماڈل ٹائون تھانہ کے انسپکٹر بشیر احمد نے سابق وزیراعظم نواز شریف کے وارنٹ گرفتاری کی رپورٹ عدالت میں پیش کی جس میں کہا گیا کہ سابق وزیراعظم نواز شریف ماڈل ٹائون رہائشگاہ پر بھی موجود نہیں ہے اور مسلم لیگ (ن) کے ڈپٹی سیکرٹری عطا تارڑ نے نواز شریف کے بیرون ملک ہونے کی تصدیق کی ہے۔رپورٹ میں بتایا گیا کہ سابق وزیراعظم نواز شریف کی رائیونڈ رہائشگاہ پر انکے سیکرٹری نے کہا کہ نواز شریف چھ ماہ سے بیرون ملک ہیں۔ احتساب عدالت نے میر شکیل کے جوڈیشل ریمانڈ میں توسیع کرتے ہوئے نواز شریف کے ناقابل ضمانت وارنٹ گرفتاری جاری کر دیئے۔

موضوعات:نوازشریف