اسلام آباد(مانیٹرنگ ڈیسک) کیبنٹ ڈویژن نے ریلوے میں اصلاحات پر مبنی تجاویز وزارت ریلوے کو بھجوا دیں،تجاویز کے مطابق ریلوے آپریشن میں بہتری کیلئے فریٹ، پسنجر اور انفراسٹرکچر کمپنیاں بنائی جائیں گی۔سی ایس ایس کی بجائے تمام افسران کی بھرتی فیڈرل پبلک سروس کمیشن کے ذریعے کرنے پر غورہورہاہے، ریلوے کی تمام ملازمتوں کو فریز کرکے کنٹریکٹ ملازمت دی جائے جبکہ ایک برس سے زائد خالی اسامیوں کو ختم
کرنے کی تجاویز دی گئیں۔ پنشن بوجھ ختم کرنے کیلئے قبل از وقت گولڈن ہینڈ شیک سکیم متعارف کروائی جائے۔ تجاویز کے مطابق ایک لاکھ 23ہزار چھے سو ستر پنشنر کا بوجھ وفاقی حکومت خود اٹھائے اور پنشن اپنے ذمے لینے کے بعد وفاق سبسڈی ختم کر دے جبکہ مستقبل میں پاکستان پوسٹ کی طرز پر ریلوے پنشن فنڈز بنانے کی تجاویز دی گئی۔ اخراجات میں کمی کیلئے2030 تک الیکٹرک ٹرین منصوبہ بنانے کی تجویز بھی شامل ہے۔
