اسلام آباد(مانیٹرنگ ڈیسک)سفارتی ذرائع کا کہنا ہے کہ چین چاہتا ہے کہ مسلم ممالک میں واحد ایٹمی ملک پاکستان مسلم ممالک کو لیڈ کرے۔اس وقت میڈیا پر یہ باتیں گردش کر رہی ہیں کہ چین خطے میں ایک نیا بلاک بنانے جا رہا ہے اور چین کا ایران کی طرف جھکائو بھی اسی سلسلے کی ایک کڑی ہے۔
بیجنگ تہران کے ساتھ 400 بلین ڈالر کی سرمایہ کاری کے حوالے سے 25 سالہ اسٹریٹجک شراکت داری کے معاہدے کو حتمی شکل دینے کے قریب ہے۔چین کے پاس خطے میں اپنا اثر و رسوخ بڑھانے کے لیے مسلم ممالک میں اپنی اہمیت بڑھانے کا اہم موقع ہے۔دریں اثنا وزیر خارجہ شاہ محمود قریشی چین کے اہم ایک روزہ دورے چین روانہ ہوگئے ۔چین روانگی سے قبل شاہ محمود قریشی نے اپنے ویڈیو پیغام میں کہا ہے کہ آج میں ایک اہم دورے پر چین روانہ ہو رہا ہوں۔دورہ سے متعلق وزیراعظم سے تفصیلی بات چیت ہوئی۔امید ہے چینی ہم منصب کے ساتھ ملاقات دونوں ممالک کے لیے مفید ثابت ہو گی۔شاہ محمود قریشی نے مزید کہا کہ وفد پاکستان کی سیاسی و عسکری سوچ کی عکاسی کرے گا۔چین کا دورہ بہت اہم اہمیت کا حامل ہے۔چینی قیادت سے مختلف امور پر گفتگو ہو گی۔
