اسلام آباد (مانیٹرنگ ڈیسک)گزشتہ روز وزیراعظم عمران خان سے ممتاز کاروباری شخصیات اور تاجر برادری کے وفد نےکراچی میں ملاقات کی۔تاجروں نے وزیراعظم عمران خان سے ہونے والی ملاقات کے دوران شکایتوں کے انبار لگا دئیے۔میڈیا رپورٹس کے مطابق ملاقات کے دوران تاجروں نے وزیراعظم سے کہا کہ آپ سے متعدد ملاقاتیں کر چکے ہیں لیکن مسائل حل نہیں ہو رہے۔ذرائع کے مطابق تاجر رہنماؤں نے عمران خان سے شکوہ کیا کہ آپ کی
معاشی ٹیم آپ کے احکامات پر عمل نہیں کرتی۔تاجروں نے وزیراعظم کو بتایا کہ سوئی سدرن گیس انتظامیہ کی نا اہلی کے باعث کراچی کی صنعتیں تباہ ہو رہی ہیں۔گیس بحران کی وجہ سے اربوں روپے کے ایکسپورٹ آرڈر وقت پر نہیں دئیے جا سکے ہیں۔وزیراعظم عمران خان کا کہنا تھا کہ گیس پریشر میں کمی کی وجہ سے مسائل ہیں۔سوئی سدرن گیس انتظامیہ کو اسلام آباد بلا کر بات کروں گا۔وزیراعظم نے تاجروں کے تمام مسائل کے حل کی یقین دہانی کروادی۔
