سیہون شریف(این این آئی)معاون خصوصی برائے اطلاعات فردوس عاشق اعوان نے کہا ہے کہ اپوزیشن آئے سیہون شریف میں اپنا چہرہ دیکھے، ملک میں استحکام اور امن سے سرمایہ کاری آتی ہے،اپوزیشن سینیٹ کو آئین کے بجائے خواہشات کے تابع چلاناچاہتی ہے، اپوزیشن کو ہدایت کی دعاہی کرسکتی ہوں، اسٹیج سجا کر اداکاریاں کرنے والوں کی وجہ سے پاکستان اس نہج پر پہنچا،
سندھ میں عوام پینے کے پانی اور خوراک کی قلت سے دوچار ہیں۔ان خیالات کا اظہار انہوں نے لعل شہباز قلندر کے مزار پر حاضری کے بعد میڈیا سے گفتگو کرتے ہوئے کیا، اس موقع پر حلیم عادل شیخ اور حاکم علی خان نوحانی اوردیگر بھی موجود تھے۔انہوں نے کہا کہ عمران خان ملک کی شناخت کی جنگ لڑرہے ہیں، قلندر کی نگری مسائل میں گھری ہوئی ہے، سندھ حکومت نااہل اور ناکام ہے، سندھ حکومت موروثی حکومت ہے۔فردوس عاشق اعوان نے کہاکہ ماضی میں سیاستدانوں نے کرپشن کرکے ملک کو مشکلا ت میں ڈالا، حکومت کرپٹ سیاستدانوں کیخلاف گھیرا تنگ رکھے گی، سینیٹ میں اپوزیشن نے سیاسی دنگل شروع کیا ہے۔انہوں نے کہاکہ عوام نے اپوزیشن کو 25جولائی کو مسترد کر دیا، سیاہ کاریوں کو مسترد کیے جانے پر یہ یوم سیاہ منا رہے تھے، عمران خان پاکستان کی بقا کی جنگ لڑرہے ہیں۔فردوس عاشق اعوان نے کہاکہ وزیراعلی سندھ بھٹوخاندان کے علاوہ عوام کی خدمت بھی کریں، ایک خاندان کے درباری بن کرسندھ حکومت کے ساتھ ناانصافی نہ کریں۔سیہون شریف وزیراعلی سندھ کا انتخابی حلقہ ہے، جس نے لعل کی نگری کو نہ سنبھالا وہ سندھ کو کیا سنبھالیں گے۔انہوں نے کہاکہ اپوزیشن آئینے میں اپناچہرہ دیکھے۔قبل ازیں معاون خصوصی سیہون شریف پہنچیں اور حضرت لعل شہباز قلندر کے مزار پر حاضری دی، پھول چڑھائے اور دعا مانگی۔
