بجٹ ہر ملک اور ہر حکومت کا اہم ترین ایونٹ ہوتا ہے‘ یہ ایونٹ حکومت اور ملک دونوں کی سیریس نیس بھی ثابت کرتا ہے اور اپروچ کو بھی‘ کل یہ حکومت اپنا پہلا بجٹ پیش کرے گی لیکن بجٹ سے عین ایک دن پہلے نیب نے آصف علی زرداری کو گرفتار کر لیا‘
یہ گرفتاری پاکستان پیپلز پارٹی‘ بھٹو خاندان یا اپوزیشن کا امتحان نہیں یہ دراصل عمران خان‘ پاکستان تحریک انصاف اور حکومت کا امتحان ہے‘ کیوں؟ کیونکہ حکومت اب بجٹ کیسے پیش کرے گی اور یہ ان حالات میں اپنا بجٹ پاس کیسے کرائے گی، حکومت ان حالات کا مقابلہ کیسے کرے گی‘یہ سوال بھی اہم ہے لیکن اس سے زیادہ اہم بات نیب ہے‘ آج نیب نے ثابت کر دیا یہ واقعی آزاد ادارہ ہے کیونکہ یہ اگر حکومت کے زیر اثر ہوتا تو حکومت نیب کو بجٹ سے ایک دن پہلے آصف علی زرداری کو گرفتار نہ کرنے دیتی‘ حکومت اب بجٹ کیسے پیش کرے گی اور کیسے پاس کرائے گی، بلاول بھٹو زرداری نے آج کی گرفتاری اور ایوان میں تقریر کرنے کی اجازت نہ ملنے پر سندھ کارڈ کھیلنے کی کوشش کی‘ یہ ٹرینڈ ٹھیک نہیں کیونکہ شاہ محمود قریشی‘ شیخ رشید اور فواد چودھری کو بولنے کی اجازت پشتون سپیکر اور بلوچ ڈپٹی سپیکر نے دی تھی‘کسی پنجابی سپیکر نے نہیں اور یہ اجازت اسد عمر کو بھی ملی تھی اور یہ کراچی کے رہنے والے ہیں،کیا پیپلز پارٹی سندھ کارڈ کھیلنے کی کوشش کر رہی ہے اور کیا یہ آخری گرفتاری ہے یا پھر اب پرویز خٹک اور حمزہ شہباز کی باری بھی آ جائے گی۔
