اسلام آباد(آن لائن) چین کے نائب سفیر لی جیانگ نے کہا ہے کہ پاک بھارت جنگ سے پورا جنوبی ایشیا تباہ ہو جائے گا ‘ اسلام آباد اور نئی دہلی دونوں ایٹمی ممالک ہیں ،نہیں چاہتے جنگ ہو ‘سی پیک دوسرے مرحلے میں داخل ہوچکا‘تیسرے فریق کی شمولیت پر بھی اتفاق رائے ہوچکا ‘ تیسرے ملک سے اقتصادی اور سماجی ترقی کے منصوبوں پر عمل ہوگا۔
منگل کو اسلام آباد میں چین کے نائب سفیرلی جیانگ نے سی پیک کانفرنس سے خطاب کرتے ہوئے کہا کہ پاک چین اقتصادی راہداری (سی پیک )پرآصف زرداری اورنوازشریف دورمیں کام ہوتارہا، سی پیک منصوبے پر تمام سیاسی جماعتوں کا اتفاق رائے ہے.چین کے نائب سفیر نے کہا کہ ملتان سکھرموٹر وے اگست کی بجائے جولائی میں مکمل ہوگی، حویلیاں تھاکوٹ شاہراہ ریشم کی توسیع رواں سال مکمل ہوگی۔لی جیانگ نے کہا کہ سی پیک اب دوسرے مرحلے میں داخل ہوچکاہے، گوادر میں ایئرپورٹ کی توسیع، ووکیشنل ٹریننگ سینٹر تعمیر ہورہاہے، گوادر میں ہسپتال بھی چینی گرانٹ سے تعمیر کیا جارہا ہے۔انہوں نے کہا کہ سی پیک کا دوسرا مرحلہ خصوصی اقتصادی زونز کی تعمیر ہے اور پہلا اقتصادی زون تعمیر کے آخری مرحلے میں ہے۔ صوبائی حکومتوں سے ذمہ داریاں جلد پوری کرنے کی توقع ہے۔چینی نائب سفیر نے کہا سی پیک میں تیسرے فریق کی شمولیت پر اتفاق رائے ہوچکا ہے، تیسرے ملک سے اقتصادی اور سماجی ترقی کے منصوبوں پر عمل ہوگا، دور دراز علاقوں کیلئے چین 3 سال میں 1 ارب ڈالرگرانٹ دے گا. پاک بھارت کشیدگی پر انھوں نے کہا ہم نہیں چاہتے پاک بھارت جنگ ہو دونوں ایٹمی ممالک ہیں، پاک بھارت جنگ کی صورت میں پورا جنوبی ایشیا تباہ ہوگا۔
