اسلام آباد (این این آئی)پاکستان مسلم لیگ (ن) کی ترجمان مریم اورنگزیب نے کہا ہے کہ نعیم الحق صاحب کی وجہ شہرت اور عمران صاحب کے ساتھ دوستی پورا پاکستان جانتا ہے ٗصرف عمران صاحب ہی اپنے ساتھ اور گھر میں چور بٹھا کر دوسروں پہ چوری کا الزام لگا سکتے ہیں ۔وزیر اعظم کے معاون خصوصی نعیم الحق کے بیان پر ردِ عمل کا اظہار کرتے ہوئے مریم اورنگزیب نے کہا کہ نعیم الحق صاحب کی وجہ شہرت اور عمران صاحب کے ساتھ دوستی پورا پاکستان جانتا ہے ،
صرف عمران صاحب ہی اپنے ساتھ اور گھر میں چور بٹھا کر دوسروں پہ چوری کا الزام لگا سکتے ہیں ۔انہوں نے کہا کہ عوامی مینڈیٹ چور حکومت صرف عوام اور ملک دشمنی کر سکتی ہے ،عمران خان صرف فارن فنڈنگ کیس میں چار سال سے مفرور ہیں۔انہوں نے کہا کہ عمران صاحب پی ٹی آئی کی اربوں روپے کی منی لانڈرنگ اور زکوۃ کے پیسوں میں خوردبرد کا الیکشن کمیشن میں جواب دیں ۔مریم اورنگزیب نے کہا کہ اتنے بڑے انکشاف کے باوجود اب تک اس معاملے میں پیشرفت تعطل کا شکار کیوں ہے؟ عمران خان جواب دیں اور زکوٰۃ کے پیسوں سے علیمہ باجی کے اربوں روپے کی بیرون ملک خفیہ جائیدادوں کا بھی جواب دیں ۔انہوں نے کہا کہ مغرب کی مثالیں دینے والے وزیراعظم سے برطانوی وزیراعظم کی بہن ایسی جائیداد پر جرمانہ دیتی تو کیا ہوتا؟جہانگیر ترین کی مسلمہ چوری ثابت ہونے پر عمران خان کی آنکھیں اور زبان کیوں بند ہے؟فیصل واوڈا کی غیرملکی غیرظاہر کردہ جائیدادوں پر عمران صاحب کیوں خاموش تماشائی ہے؟۔انہوں نے کہا کہ ہیلی کاپٹر کیس میں ملزم عمران صاحب وزیراعظم بن گے لیکن نیب کوئی کارروائی نہ کرسکی۔ مر یم اور نگزیب نے کہا کہ یہ کیسا احتساب ہے جو شہبازشریف کا میڈیکل توروک سکتا ہے لیکن عمران خان سے ہیلی کاپٹر کا نہیں پوچھ سکتا؟،یہ کیسا احتساب ہے جو گرفتار پہلے کرتا ہے اور الزام بعد میں تیار کرتا ہے؟۔انہوں نے کہا کہ تین سال گزرنے کے باوجود نیب نوازشریف کیخلاف کسی بھی بدعنوانی، کرپشن ، یا kick backsکا الزام تک نہیں لگا سکی۔
