لندن(آن لائن)وزیراعظم کے معاون خصوصی برائے اوور سیز پاکستانی زلفی بخاری نے کہا ہے کہ ذاتی استعمال کے موبائل فونز پر ٹیکس نہیں ہے،موبائل فون کی رجسٹریشن کا عمل آسان کر رہے ہیں۔اتوار کے روز وزیراعظم کے معاون خصوصی زلفی بخاری نے صحافیوں سے گفتگو کرتے ہوئے کہا کہ موبائل فون کیلئے اوورسیز پاکستانیوں کی شکایات درست ہیں،موبائل فون رجسٹریشن کیلئے ایئرپورٹ پر قطاریں لگنے کا نوٹس لیا ہے، ذاتی استعمال کے موبائل فونز پر ٹیکس نہیں ہے،موبائل فون کی رجسٹریشن کا عمل آسان کر رہے ہیں۔

انہوں نے کہا کہ اوور سیز کے مسائل وزیر اعظم کے ایجنڈے میں سرفہرست ہیں، دہری شہریت والوں کے مسائل کے حل کیلئے قانون سازی کی جائیگی، وزیراعظم بھی تمام اوورسیزپاکستانیوں کوساتھ لے کر چلیں گے۔زلفی بخاری کا کہنا تھا کہ تمام اداروں کو مضبوط کرنے کی ضرورت ہے،بہت جلدنیب میں میری انکوائری ختم ہوجائیگی، نیب قوانین میں تبدیلیوں کی ضرورت ہے۔ایک سوال کے جواب میں زلفی بخاری نے کہا ہے کہ ہتھکڑیوں میں پروفیسر کی موت کا واقعہ افسوناک ہے واقعہ کی تحقیقات ہونی چاہئیں۔

موضوعات:زلفی بخاری