اسلام آباد(این این آئی)پاکستان اور امریکہ نے وفود کے درمیان دوطرفہ تعلقات میں بہتری کیلئے کوششیں جاری رکھنے پر اتفاق کیا ہے جبکہ پاکستان نے امریکہ پر اقتصادی و تجارتی تعاون اور عوامی روابط بڑھانے پر زور دیا ہے ۔منگل کو امریکی نائب معاون وزیر خارجہ برائے وسطی و جنوبی ایشیا ایلس ویلز نے دفتر خارجہ میں اعلیٰ سطحی وفد سے ملاقات کی ۔پاکستانی وفد کی قیادت ایڈیشنل سیکرٹری فارن آفس آفتاب کھوکھر نے کی ، مذاکرات میں وزارتِ داخلہ اور وزارت دفاع کے اعلیٰ افسران نے شرکت کی۔
نجی ٹی وی کے مطابق اعلی سطح کے وفود کی ملاقات میں افغانستان میں امن عامہ اور علاقائی سلامتی پر تبادلہ خیال کیا گیا۔ پاکستان نے اقتصادی و تجارتی تعاون اور عوامی روابط بڑھانے پر زور دیا جبکہ وفود کے درمیان دو طرفہ تعلقات میں بہتری کی کوشش جاری رکھنے پر بھی اتفاق کیا گیا۔دفتر خارجہ کے مطابق امریکی نائب وزیر خارجہ ایلس ویلز پاکستانی وزیر خارجہ شاہ محمود قریشی اور وزیر خزانہ اسد عمر سے اہم ملاقاتیں کریں گی ان کی وزیراعظم عمران خان سے بھی ملاقات متوقع ہے۔
