لاہور ( این این آئی)18 اگست کی تاریخ ملک میں جمہوریت کے لئے ایک تاریخی دن ہے۔ دس سال پہلے 18اگست 2008 ے میں اس وقت کے آمر جنرل پرویز مشرف نے پارلیمنٹ میں مواخذے کی قرارداد سے پہلے ہی استعفیٰ دیکر عنانِ اقتدار عوامی نمائندوں کو منتقل کیا۔ دس سال ملک میں جمہوریت کا دور خوب چلا اور دو بڑی جماعتوں نے پہلی بار اپنی اپنی جمہوری حکومتوں کی مدت پوری کی۔اٹھارہ اگست 2008 ء کے بعد اب اٹھارہ اگست 2018 ء آ رہی ہے۔ دن وہی، مہینہ وہی، مگر دس سال بعد ایک تیسری سیاسی جماعت تحریک انصاف جمہوریت

کو مضبوط کرنے جا رہی ہے۔دس سال پہلے جس تاریخ کو جنرل پرویز مشرف رخصت ہوئے، اسی تاریخ کو عمران خان عنانِ اقتدار سنبھال کر ملک میں جمہوریت کی نئی تاریخ رقم کرنے جا رہے ہیں۔سینیٹر فیصل جاوید کے مطابق 18 اگست کا فیصلہ عمران خان نے خود کیا ہے۔ 18.08.08اور 18.08.18کے ہندسوں میں فرق تو صرف 1کا ہے لیکن ان تاریخوں کے دوران تین جمہوری حکومتوں کی تاریخ ملک میں پروان چڑھتی جمہوریت کی گواہی ضرور دے رہی ہے۔